കോട്ടയം : നിയമസഭാ തെരഞ്ഞെടുപ്പിനുള്ള കേരള കോൺഗ്രസ് (എം) സ്ഥാനാർത്ഥികളെ പ്രഖ്യാപിച്ചു. പാലാ നിയോജകമണ്ഡലത്തിൽ പാർട്ടി ചെയർമാൻ ജോസ് കെ മാണി മത്സരിക്കും. എൽഡിഎഫിന്റെ സഖ്യകക്ഷിയായ കേരള കോൺഗ്രസ് (എം) 12 സീറ്റുകളിലേക്കുള്ള സ്ഥാനാർത്ഥികളെയാണ് പ്രഖ്യാപിച്ചത്.
ജോസ് കെ മാണി യുഡിഎഫ് നേതാവും സിറ്റിംഗ് എംഎൽഎയുമായ മാണി സി കാപ്പനെയും ബിജെപി നേതാവ് ഷോൺ ജോർജിനേയും നേരിടും. ഇടുക്കിയിൽ മന്ത്രി റോഷി അഗസ്റ്റിൻ, കാഞ്ഞിരപ്പള്ളിയിൽ എൻ ജയരാജ്, ചങ്ങനാശേരിയിൽ ജോബ് മൈക്കിൾ, പൂഞ്ഞാറിൽ സെബാസ്റ്റ്യൻ കുളത്തുങ്കൽ, റാന്നിയിൽ പ്രമോദ് നാരായൺ എന്നിവരുൾപ്പെടെ എല്ലാ എംഎൽഎമാരെയും കേരള കോൺഗ്രസ് (എം) നിലനിർത്തി.
ചാലക്കുടിയിൽ മത്സരിക്കുന്നത് കോൺഗ്രസ് കൗൺസിലർ ബിജു ചിറയത്ത് ആണ്. സ്ഥാനാർത്ഥികളെ പ്രഖ്യാപിക്കുന്നതിന് മണിക്കൂറുകൾക്ക് മുമ്പാണ് ബിജു ചിറയത്ത് കോൺഗ്രസിൽ നിന്ന് രാജിവെച്ച് കേരള കോൺഗ്രസിൽ ചേർന്നത്. തൊടുപുഴയിൽ സിറിയക് ചാഴിക്കാടൻ, പിറവത്ത് സാബു കെ ജേക്കബ്, ഇരിക്കൂരിൽ മാത്യു കുന്നപ്പിള്ളി, കടുത്തുരുത്തിയിൽ നിർമ്മല ജിമ്മി, പെരുമ്പാവൂരിൽ ബേസിൽ പോൾ എന്നിവരാണ് മറ്റ് സ്ഥാനാർത്ഥികൾ.
