ന്യൂഡൽഹി: സുപ്രീംകോടതിയുടെ 51ാമത് ചീഫ് ജസ്റ്റിസായി ജസ്റ്റിസ് സഞ്ജീവ് ഖന്ന സ്ഥാനമേൽക്കും. നിലവിലെ ചീഫ് ജസ്റ്റിസ് ഡി.വൈ. ചന്ദ്രചൂഡ് സ്ഥാനമൊഴിയുന്നതിൻ്റെ പിറ്റേദിവസം നവംബർ 11 നാണ് ജസ്റ്റിസ് സഞ്ജീവ് ഖന്ന സത്യപ്രതിജ്ഞ ചെയ്യുക.
നിയമമന്ത്രി അർജുൻ റാം മേഘ്വാൽ എക്സിലൂടെ അറിയിച്ചതാണിത്. 2022 നവംബർ എട്ടിനാണ് ജസ്റ്റിസ് ചന്ദ്രചൂഡ് ചീഫ് ജസ്റ്റിസായി ചുമതലയേറ്റത്.
1960 മേയ് 14ന് ജനിച്ച ജസ്റ്റിസ് ഖന്ന ഡൽഹി സർവ്വകലാശാല കാമ്പസ് ലോ സെന്ററിലാണ് പഠിച്ചത്. 2005 ൽ ഡൽഹി ഹൈകോടതിയിൽ അഡീഷനൽ ജഡ്ജായി ചുമതലയേൽക്കുകയും 2006 ൽ സ്ഥിരപ്പെടുകയും ചെയ്തു. 2019 ജനുവരി 18നാണ് സുപ്രീംകോടതി ജഡ്ജിയായത്.
