കട്ടക്ക് : ഒഡിഷയിലെ കട്ടക്കിലുള്ള എസ്സിബി മെഡിക്കൽ കോളേജ് ആശുപത്രിയിൽ വൻതീപ്പിടുത്തം. തിങ്കളാഴ്ച പുലർച്ചെ ട്രോമ കെയർ വിഭാഗത്തിലാണ് ദാരുണ സംഭവം നടന്നത്. തീപ്പിടുത്തത്തിൽ 10 രോഗികൾ മരിച്ചു. നിരവധി പേർക്ക് പരിക്കേറ്റിട്ടുണ്ട്. ഐസിയുവിന്റെ എയർ കണ്ടീഷനിംഗ് സിസ്റ്റത്തിലോ മെഡിക്കൽ ഉപകരണങ്ങളിലോ ഉണ്ടായ ഷോർട്ട് സർക്യൂട്ട് മൂലമാണ് തീപ്പിടുത്തമുണ്ടായതെന്ന് സംശയിക്കുന്നു.
പ്രാഥമിക വിവരം അനുസരിച്ച്, പുലർച്ചെ മൂന്ന് മണിയോടെയാണ് സംഭവം ഉണ്ടായത്. ഗുരുതരമായ നിരവധി രോഗികൾ ചികിത്സയിലായിരുന്ന ട്രോമ കെയർ യൂണിറ്റിന്റെ ഒന്നാം നിലയിലായിരുന്നു തീപ്പിടുത്തം. മിനിറ്റുകൾക്കുള്ളിൽ, ഐസിയു വാർഡിൽ കനത്ത പുക നിറഞ്ഞു, ഇത് ആളുകളിൽ പരിഭ്രാന്തി പരത്തി.
ആശുപത്രി ജീവനക്കാരും അഗ്നിശമന സേനാംഗങ്ങളും രോഗികളെ ഒഴിപ്പിക്കാൻ നടപടി സ്വീകരിച്ചെങ്കിലും, കട്ടിയുള്ള പുകയും തീയുടെ തീവ്രതയും തടസ്സം സൃഷ്ടിച്ചു. ഇതിനകം ഗുരുതരാവസ്ഥയിലായിരുന്ന നിരവധി പേർക്ക് ജീവൻ നഷ്ടപ്പെട്ടു. പലരേയും രക്ഷപ്പെടുത്തി തുടർ ജീവൻ രക്ഷാ വാർഡിലേക്ക് മാറ്റി.
(Photo Courtesy : PTI)
മരിച്ചവരുടെ കുടുംബങ്ങൾക്ക് 25 ലക്ഷം രൂപ നഷ്ടപരിഹാരം
സംഭവത്തെത്തുടർന്ന്, മുഖ്യമന്ത്രി മാജ്ഹി ആശുപത്രിയിലെത്തി സ്ഥിതിഗതികൾ അവലോകനം ചെയ്യുകയും ഇരകളുടെ കുടുംബങ്ങളെയും തീപ്പിടുത്തത്തിൽ പൊള്ളലേറ്റവരെയും സന്ദർശിച്ചു. . തുടർന്ന് ദുരന്തത്തിൽ മരിച്ചവരുടെ കുടുംബങ്ങൾക്ക് 25 ലക്ഷം രൂപ നഷ്ടപരിഹാരം പ്രഖ്യാപിച്ചു.
ഒഡീഷ ആരോഗ്യ സെക്രട്ടറി അശ്വതി എസ്, കട്ടക്ക് ജില്ലാ കളക്ടർ ദത്താത്രയ ഭൗസാഹെബ് ഷിൻഡെ, കട്ടക്ക് ഡിസിപി ഋഷികേശ് ഖിലാരി എന്നിവർ രക്ഷാപ്രവർത്തനങ്ങൾക്ക് മേൽനോട്ടം വഹിച്ചു.
ഐസിയുവിലെ എയർ കണ്ടീഷനിംഗ് സിസ്റ്റത്തിലോ മെഡിക്കൽ ഉപകരണങ്ങളിലോ ഉണ്ടായ വൈദ്യുത ഷോർട്ട് സർക്യൂട്ടാണ് തീപ്പിടുത്തത്തിന് കാരണമെന്ന് സംശയിക്കുന്നു. കൃത്യമായ കാരണം കണ്ടെത്തുന്നതിനും അഗ്നി സുരക്ഷാ പ്രോട്ടോക്കോളുകളിലെ സാധ്യമായ വീഴ്ചകൾ പരിശോധിക്കുന്നതിനും ഉന്നതതല അന്വേഷണത്തിന് ഉത്തരവിട്ടിട്ടുണ്ട്.
1944-ൽ സ്ഥാപിതമായ എസ്സിബി മെഡിക്കൽ കോളേജ് ആൻഡ് ഹോസ്പിറ്റൽ, ഏറ്റവും പഴക്കമേറിയതും വലുതുമായ സർക്കാർ മെഡിക്കൽ സ്ഥാപനങ്ങളിൽ ഒന്നാണ്. ഒഡീഷയിലെ ഏറ്റവും വലിയ റഫറൽ ആശുപത്രിയാണിത്.
