കോഴിക്കോട് : ആരോഗ്യനില മോശമായതിനെ തുടർന്ന്
കോഴിക്കോട്ടെ സ്വകാര്യ ആശുപത്രിയിൽ പ്രവേശിപ്പിക്കപ്പെട്ട എംടി വാസുദേവൻ നായരുടെ ആരോഗ്യ നില അതീവ ഗുരുതരമായി തുടരുന്നു. ആരോഗ്യ നില ഗുരുതരമാണെന്നും ഹൃദയസ്തംഭനം ഉണ്ടായെന്നും അറിയിച്ചുകൊണ്ട് മെഡിക്കല് ബുള്ളറ്റിൻ പുറത്തിറക്കിയിട്ടുണ്ട് ആശുപത്രി അധികൃതര്. ശ്വാസ തടസത്തെ തുടര്ന്ന് ഇക്കഴിഞ്ഞ 15നാണ് എംടിയെ കോഴിക്കോട്ടെ ബേബി മെമ്മോറിയൽ ആശുപത്രിയിൽ പ്രവേശിപ്പിച്ചത്.
ശ്വസന, ഹൃദയ സംബന്ധമായ അസുഖങ്ങൾക്ക് പുറമെ ശരീരത്തിന്റെ മറ്റു അവയവങ്ങളുടെ പ്രവർത്തനവും മോശമായതായി ഡോക്ടർമാർ അറിയിച്ചു. ഒരു മാസത്തിനിടെ പല തവണയായി എം ടി ആശുപത്രിയിൽ ചികിൽസ തേടിയിരുന്നു. ഹൃദയസ്തംഭനം ഉള്പ്പെടെ ഗുരുതര ആരോഗ്യ പ്രശ്നങ്ങള് തുടരുകയാണെന്നും വിദഗ്ധ ഡോക്ടര്മാരുടെ നേതൃത്വത്തിൽ ചികിത്സ നൽകിവരുന്നതായും ആശുപത്രി അധികൃതര് അറിയിച്ചു.
അഞ്ചു ദിവസത്തെ ചികിത്സയിലും കാര്യമായ പുരോഗതിയുണ്ടായില്ല. ഇന്നലെ രാത്രിയോടെ രക്തസമ്മര്ദത്തിലടക്കം കാര്യമായ വ്യതിയാനമുണ്ടായി. ഇതേതുടര്ന്നാണ് ഇന്ന് മെഡിക്കല് ബുള്ളറ്റിൻ പുറത്തിറക്കിയത്. എംടിയുടെ മകള് അശ്വതി, സുഹൃത്തും സാഹിത്യക്കാരനുമായ എംഎൻ കാരശ്ശേരി ഉള്പ്പെടെയുള്ളവരും ആശുപത്രിയിലുണ്ട്
