കൊച്ചി : കൊച്ചി നഗരത്തില്‍ തുടരുന്ന സ്വകാര്യ ബസ് ജീവനക്കാരുടെ അഴിഞ്ഞാട്ടത്തിന് ഒരു വേളയെങ്കിലും തടയിടാനൊരുങ്ങി യുവതി. കുടുംബ സുഹൃത്തായ യുവാവിനൊപ്പം ബൈക്കിൽ യാത്ര ചെയ്യുകയായിരുന്നു യുവതി. തുടരെ തുടരെ ഹോണ്‍ മുഴക്കി പിന്നിലൂടെ പാഞ്ഞെത്തിയ ബസ് ഇവരെ ഇടിച്ചിട്ടു. തലനാരിഴയ്ക്കാണ് രക്ഷപ്പെട്ടതെന്ന് യുവാവ് പറഞ്ഞു. ഇതിൽ പ്രകോപിതയായാണ് യുവതി മുന്നില്‍ കയറി നിന്ന് ബസ് തടഞ്ഞുനിർത്തിയത്.
ഇന്നലെ രാവിലെ 9.30ന് മുഹമ്മദ് റിസ്വാന്‍ എന്ന കുടുംബ സുഹൃത്തുമൊത്ത് ഫോര്‍ട്ട്‌കൊച്ചിയിലേക്ക് വരുന്ന വഴിയാണ് യുവതിക്ക് ഈ ദുരനുഭവമുണ്ടായത്. ‘വഹ്ബിയ’ എന്ന ബസാണ് അപകടം ഉണ്ടാക്കിയത്. ഇടപ്പള്ളി മേല്‍പാലത്തിനു സമീപത്ത് വെച്ചാണു പിന്നിൽ ഹോണടിച്ചെത്തിയ ബസ് ഇവർ സഞ്ചരിച്ച ബൈക്കില്‍ ഇടിച്ചത്. പല തവണ ബൈക്കില്‍ ബസിടിപ്പിച്ചതായി ഇവർ പറഞ്ഞു. ഇതോടെ യുവതിയും യുവാവും ചേര്‍ന്നു ബസ് തടഞ്ഞിടുകയായിരുന്നു. ബസ് ഇടിപ്പിച്ചു കൊല്ലാന്‍ നോക്കുകയായിരുന്നെന്ന് യുവതി ആരോപിച്ചു. ബസിടിച്ചതു ചോദ്യം ചെയ്യാന്‍ ഡ്രൈവര്‍ക്കു സമീപമെത്തിയ തന്നെ ജീവനക്കാര്‍ മര്‍ദിച്ചതായി റിസ്വാനും പറഞ്ഞു.
പോലീസ് എത്തിയാണ് ബസ്സ് തടഞ്ഞ് നിർത്തിയ യുവതിയെ മാറ്റിയത്. പരാതി നല്‍കിയെങ്കിലും ബസുകാരെ സംരക്ഷിക്കുന്ന നിലപാടാണ് പോലീസ് സ്വീകരിച്ചതെന്നും ഇവർക്ക് പരാതിയുണ്ട്. യുവാവ് ആശുപത്രിയില്‍ ചികിത്സ തേടി.
