ന്യൂഡൽഹി : മണ്ഡല പുനർനിർണ്ണയത്തെക്കുറിച്ച് ഇന്ത്യയിലെ വടക്കും തെക്കും തമ്മിലുള്ള ചർച്ച ശക്തമാകുന്നതിനിടെ, ദക്ഷിണേന്ത്യൻ സംസ്ഥാനങ്ങളുടെ ആശങ്കകൾ പരിഹരിക്കുന്നതിനായി ‘50% സീറ്റ് വർദ്ധന’ ഫോർമുല മുന്നോട്ടുവെച്ച് കേന്ദ്രസർക്കാർ. ഈ ഫോർമുല നടപ്പിലാക്കുകയാണെങ്കിൽ കേരളത്തിലെ ലോക്സഭാ സീറ്റുകളുടെ എണ്ണം നിലവിലുള്ള 20-ൽ നിന്ന് 30 ആയി ഉയരുമെന്നാണ് സൂചനകൾ. ലോകസഭയിൽ തമിഴ്നാടിന്റെ നിലവിലെ പ്രാതിനിധ്യം 39 ആണ്. സർക്കാർ പറയുന്നത് ഇത് 58 ആയി ഉയരുമെന്നാണ്. വ്യാഴാഴ്ച നടക്കുന്ന പാർലമെന്റ് സമ്മേളനത്തിൽ പ്രധാനമന്ത്രി നരേന്ദ്ര മോദിയും കേന്ദ്രമന്ത്രി അമിത്ഷായും ഇതുസംബന്ധിച്ച് സംസാരിച്ചേക്കും.
2011-ലെ സെൻസസ് മാത്രം അടിസ്ഥാനമാക്കിയാണ് മണ്ഡല പുനർനിർണയം നടത്തുന്നതെങ്കിൽ കേരളത്തിന് പരമാവധി 23 സീറ്റുകൾ മാത്രമേ ലഭിക്കുകയുള്ളൂ. എന്നാൽ ജനസംഖ്യാനുപാതികമായ വർദ്ധനയ്ക്ക് പുറമെ, സീറ്റുകളിൽ 50 ശതമാനം വർദ്ധനകൂടി ഉറപ്പാക്കുന്ന ഫോർമുല പ്രയോഗിച്ചാൽ അത് 30 സീറ്റുകളിലേക്കെത്തും. ജനസംഖ്യാ നിയന്ത്രണം വിജയകരമായി നടപ്പിലാക്കിയ സംസ്ഥാനങ്ങൾക്ക് ജനാധിപത്യ പ്രക്രിയയിൽ പ്രാതിനിധ്യം കുറഞ്ഞുപോകുന്നു എന്ന പരാതി പരിഹരിക്കാനാണ് കേന്ദ്രം ഇത്തരമൊരു നീക്കം നടത്തുന്നത്.
എന്നാൽ, ഇത് വെറും മിഥ്യയാണെന്നാണ് കോൺഗ്രസ് നേതാവും മുൻ ധനമന്ത്രിയുമായ പി. ചിദംബരം പറയുന്നത്. ലോക്സഭയിൽ ജനസംഖ്യാ വളർച്ചാ നിരക്ക് സ്ഥിരപ്പെടുത്തിയ അഞ്ച് ദക്ഷിണേന്ത്യൻ സംസ്ഥാനങ്ങളുടെ പ്രാതിനിധ്യം ഈ ഡീലിമിറ്റേഷൻ കുറയ്ക്കുമെന്നാണ് പി. ചിദംബരം മുന്നറിയിപ്പ് നൽകുന്നു. “നിലവിൽ ഈ സംസ്ഥാനങ്ങൾ ജനസംഖ്യയുടെ 24.3 ശതമാനമാണ്. എന്നാൽ ഡീലിമിറ്റേഷനുശേഷം ഇത് 20.7 ശതമാനമായി കുറയും. ലോക്സഭയിൽ തമിഴ്നാടിന്റെ നിലവിലെ പ്രാതിനിധ്യം 39 ആണ്. സർക്കാർ പറയുന്നത് 58 ആയി ഉയരുമെന്നാണ്. ഇത് വെറും മിഥ്യയാണെന്നാണ് ഞാൻ പറഞ്ഞത്. അതിർത്തി നിർണ്ണയം പൂർത്തിയാകുമ്പോൾ ഈ 58 എണ്ണം 46 ആയി കുറയും. മറുവശത്ത്, ഉത്തർപ്രദേശിന്റെ നിലവിലെ എണ്ണം 80 ആണ്. ആദ്യം ഇത് 120 ആയി ഉയരും, അതിർത്തി നിർണ്ണയത്തിന് ശേഷം ഇത് ഏകദേശം 140 ആയി വർദ്ധിക്കും.” – ചിദംബരം ചൂണ്ടിക്കാട്ടുന്നു.
ഓരോ സംസ്ഥാനവും കൈവരിച്ച സാമ്പത്തിക പുരോഗതി കൂടി സീറ്റ് നിർണ്ണയത്തിൽ ഘടകമാകണമെന്ന് തെലങ്കാന മുഖ്യമന്ത്രി രേവന്ത് റെഡ്ഡി ഉൾപ്പെടെയുള്ളവർ ആവശ്യപ്പെട്ടിരുന്നു. മുഖ്യമന്ത്രി പിണറായി വിജയൻ, തമിഴ്നാട് മുഖ്യമന്ത്രി എം.കെ. സ്റ്റാലിൻ, തെലങ്കാന മുഖ്യമന്ത്രി രേവന്ത് റെഡ്ഡി ഉൾപ്പെടെയുള്ളവർ കേന്ദ്രനീക്കത്തിനെതിരെ രംഗത്ത് വന്നിരുന്നു.
തമിഴ്നാടിന് ദോഷം വരുത്തുന്ന ഏതെങ്കിലും നടപടി സ്വീകരിച്ചാൽ, അല്ലെങ്കിൽ മണ്ഡല പുനർനിർണ്ണയം വടക്കൻ സംസ്ഥാനങ്ങളുടെ രാഷ്ട്രീയ ശക്തി അനുപാതമില്ലാതെ വർദ്ധിപ്പിച്ചാൽ, പൂർണ്ണ ശക്തിയോടെയുള്ള പ്രതിഷേധങ്ങൾ നടത്തി തമിഴ്നാടിനെ പൂർണ്ണമായും സ്തംഭിപ്പിക്കുമെന്ന് തമിഴ്നാട് മുഖ്യമന്ത്രി സ്റ്റാലിൻ ഒരു വീഡിയോ സന്ദേശത്തിൽ മുന്നറിയിപ്പ് നൽകിയിരുന്നു.
ദക്ഷിണേന്ത്യൻ സംസ്ഥാനങ്ങളുടെ ആശങ്കകൾക്കിടയിൽ, ഏപ്രിൽ 16 മുതൽ 18 വരെ നടക്കുന്ന പാർലമെന്റിന്റെ പ്രത്യേക സമ്മേളനത്തിൽ മൂന്ന് ബില്ലുകളാണ് കേന്ദ്ര സർക്കാർ അവതരിപ്പിക്കാനിരിക്കുന്നത്. ഭരണഘടന (131-ാം ഭേദഗതി) ബിൽ – 2026, ഡീലിമിറ്റേഷൻ ബിൽ – 2026, കേന്ദ്രഭരണ പ്രദേശ ബിൽ എന്നിവയാണ് അവ. ഇത് മൊത്തം ലോക്സഭാ സീറ്റുകളുടെ എണ്ണം 543 ൽ നിന്ന് 850 ആയി വർദ്ധിപ്പിക്കും. 2011 ലെ സെൻസസ് അടിസ്ഥാനമാക്കിയായിരിക്കും ഈ മണ്ഡല പുനർനിർണ്ണയം. അതുവഴി 2029 ലെ ലോക്സഭാ തെരഞ്ഞെടുപ്പ് മുതൽ 33% വനിതാ സംവരണം നടപ്പിലാക്കാൻ കഴിയും.
ജനസംഖ്യാ നിയന്ത്രണ നടപടികൾ നടപ്പിലാക്കുന്നതിലൂടെ സർക്കാർ തങ്ങളെ ശിക്ഷിക്കുകയാണെന്ന് ദക്ഷിണേന്ത്യൻ സംസ്ഥാനങ്ങൾ വാദിക്കുന്നു. ഫെഡറൽ ഘടനയ്ക്കെതിരായ ആക്രമണമായാണ് അവർ ഇതിനെ കാണുന്നത്. 1970 കളിൽ കേന്ദ്ര സർക്കാർ കുടുംബാസൂത്രണം പ്രോത്സാഹിപ്പിച്ചു. ദക്ഷിണേന്ത്യൻ സംസ്ഥാനങ്ങൾ അത് വിജയകരമായി നടപ്പിലാക്കി. അവരുടെ ഫെർട്ടിലിറ്റി നിരക്ക് 2.1 എന്ന റീപ്ലേസ്മെന്റ് ലെവലിൽ താഴെയാണ്. ഇത് ദക്ഷിണേന്ത്യൻ സംസ്ഥാനങ്ങളിലെ ജനസംഖ്യാ സ്തംഭനത്തിലേക്ക് നയിച്ചു. 2011 ലെ സെൻസസിൽ അവരുടെ ജനസംഖ്യാ വളർച്ചയും കുറവായിരുന്നു. 2011 – ലേയോ അതിനു ശേഷമുള്ള സെൻസസുകളുടെയോ അടിസ്ഥാനത്തിൽ സീറ്റുകൾ അനുവദിച്ചിരുന്നെങ്കിൽ, ഉത്തർപ്രദേശ്, ബീഹാർ, രാജസ്ഥാൻ, മധ്യപ്രദേശ് തുടങ്ങിയ വടക്കൻ സംസ്ഥാനങ്ങൾക്ക് കൂടുതൽ സീറ്റുകൾ ലഭിക്കുമായിരുന്നു. കാരണം അവരുടെ ജനസംഖ്യ കൂടുതൽ വർദ്ധിച്ചു.
നിലവിൽ, ദക്ഷിണേന്ത്യൻ സംസ്ഥാനങ്ങളുടെ ജനസംഖ്യാ അനുപാതം കൂടുതലാണ്. പുതിയ അതിർത്തി നിർണ്ണയം അവയുടെ ആപേക്ഷിക അനുപാതം കുറയ്ക്കും. തമിഴ്നാട്ടിൽ നിലവിൽ 39 ലോക്സഭാ സീറ്റുകളാണുള്ളത്. അതിർത്തി നിർണ്ണയത്തിനുശേഷം, തമിഴ്നാടിന്റെ സീറ്റുകൾ 50-51 ആയി ഉയരും. എന്നിരുന്നാലും, തമിഴ്നാടിന്റെ മൊത്തത്തിലുള്ള വിഹിതം കുറയും. അതിർത്തി നിർണ്ണയം മൂലം തമിഴ്നാടിന് 11 സീറ്റുകളും കേരളത്തിൽ 8 സീറ്റുകളും നഷ്ടപ്പെടുമെന്ന് തെരഞ്ഞെടുപ്പ് വിശകലന വിദഗ്ധൻ യോഗേന്ദ്ര യാദവ് എക്സിൽ പങ്കുവെച്ച കുറിപ്പിൽ അവകാശപ്പെട്ടു.
അഞ്ച് ദക്ഷിണേന്ത്യൻ സംസ്ഥാനങ്ങളിലെ ആകെ സീറ്റുകൾ വടക്കൻ സംസ്ഥാനങ്ങളെ അപേക്ഷിച്ച് ദുർബലമാകുമെന്ന് ദക്ഷിണേന്ത്യൻ സംസ്ഥാനങ്ങൾ പറയുന്നു. ഇതുമൂലം സർക്കാരിന്റെ നയങ്ങളായ ധനസഹായം, ഭാഷ, വികസന പദ്ധതികൾ എന്നിവ വടക്ക് കേന്ദ്രീകൃതമായി മാറിയേക്കാം.
