പ്രതീത്മാകചിത്രം –
ബംഗളുരു : കർണാടകയിലെ ഷിരൂരിൽ മണ്ണിടിച്ചിലിൽ കാണാതായ കോഴിക്കോട് സ്വദേശി അർജുനു വേണ്ടി വ്യാപക തിരച്ചിൽ ആരംഭിച്ച് പത്താംനാൾ പിന്നിടുകയാണ്. അർജുൻ്റെ ലോറി ഗംഗാവലി നദിയിൽ ഇന്നലെ കണ്ടെത്തിയിരുന്നു. ഇതിനെ തുടർന്ന് കൂടുതൽ തിരച്ചിലിൻ്റെ ഭാഗമായി ഗംഗാവലി പുഴയിൽ നേവി ടെസ്റ്റ് ഡൈവ് നടത്തും. മുങ്ങൽ വിദഗ്ധർക്ക് പുഴയുടെ അടിത്തട്ടിലേക്ക് പോകാൻ കഴിയുമോ എന്നതാണ് ടെസ്റ്റ് ഡൈവിൻ്റെ ഉദ്ദേശ്യ ലക്ഷ്യം. പുഴയിലെ ഒഴുക്കിന്റെ ശക്തിയും പരിശോധിക്കും
ഒഴുക്ക് രണ്ട് മുതൽ മൂന്ന് നോട്ട്സ് വരെയെങ്കിൽ സുരക്ഷിതമായി ഡൈവ് ചെയ്യാൻ കഴിയും. എന്നാൽ, ഇന്നലെ പുഴയിലെ ഒഴുക്ക് 8 നോട്ട്സ് വരെയായിരുന്നു. 100 കിലോ ഭാരം കെട്ടിയ വടം ഇറക്കി നോക്കിയെങ്കിലും അത് ഒഴുകി നീങ്ങി. ഇന്ന് ഒഴുക്ക് കുറഞ്ഞാൽ ഉടൻ മുങ്ങൽ വിദഗ്ധർ ഇറങ്ങുമെന്ന് നാവിക സേന. പരമാവധി 2 മണിക്കൂർ സമയമാണ് ഓപ്പറേഷൻ പൂർത്തിയാക്കാൻ പ്രതീക്ഷിക്കുന്നത്.
