സ്കൂൾ പ്രവൃത്തി ദിവസം 220 ആക്കിയതിനെതിരെ ഹൈക്കോടതിയിൽ ഹർജി നൽകി അധ്യാപക സംഘടനാ പ്രതിനിധികൾ. പ്രവർത്തി ദിവസങ്ങളുടെ എണ്ണം വർദ്ധിപ്പിച്ചത് സർക്കാരിന്റെ നയമപരമായ തീരുമാനം അല്ലേയെന്ന് കോടതി. സ്കൗട്ടും എൻഎസ്എസും അടക്കമുള്ളവ ശനിയാഴ്ചകളിലാണ് പ്രവർത്തിക്കുന്നതെന്നും വർഷങ്ങളായുള്ള രീതിയാണ് മാറ്റിയതെന്നും ഹർജിക്കാർ അറിയിച്ചു. പ്രായോഗികമായി പ്രശ്നത്തിന് പരിഹാരം കാണാൻ കഴിയില്ലേയെന്ന് ചോദിച്ച കോടതി ഹർജി പരിഗണിക്കാൻ സർക്കാരിന്റെ മറുപടിയ്ക്കായി ഒരാഴ്ചത്തേക്ക് മാറ്റി.
പുതിയ അദ്ധ്യയന വര്ഷത്തെ വിദ്യാഭ്യാസ കലണ്ടറിനെതിരെ അദ്ധ്യാപക സംഘടനകൾ കടുത്ത പ്രതിഷേധമറിയിച്ചിരുന്നു. കെ എസ് ടി എ ഉള്പ്പടെയുള്ള ഭരണാനുകൂല സംഘടനകള് പരസ്യ പ്രതികരണവുമായി രംഗത്തെത്തി. വിദ്യാഭ്യാസനിയമം പരിഗണിക്കാതെയാണ് പുതിയ കലണ്ടറെന്നാണ് അദ്ധ്യാപക സംഘടനകളുടെ പരാതി. 25 ശനിയാഴ്ചകള് ഉള്പ്പെടെ 220 അദ്ധ്യയന ദിനം തികക്കുന്ന രീതിയിലാണ് പുതിയ കലണ്ടര്. കഴിഞ്ഞ വര്ഷത്തേക്കാള് 16 ശനിയാഴ്ചകൾ പുതിയ കലണ്ടറിൽ പ്രവര്ത്തിദിനങ്ങളായി. ഇത് ദേശീയ വിദ്യാഭ്യാസ അവകാശ നിയമത്തിന് എതിരാണെന്ന് അധ്യാപക സംഘടനകളുടെ വാദം.
