ബംഗളൂരു : തമിഴ്‌നാടിന് വെള്ളം വിട്ടുകൊടുക്കണമെന്ന കാവേരി ജല മാനേജ്‌മെന്റ് അതോറിറ്റിയുടെ ( സിഡബ്ല്യുഎംഎ ) നിർദ്ദേശത്തിൽ പ്രതിഷേധം ശക്തമാകുന്നതിനിടെ തമിഴ്നാട് മുഖ്യമന്ത്രി വിജയ് നായകനായി എത്തിയ ജനനായകൻ സിനിമയുടെ പ്രദർശനം കർണാടകയിൽ നിർത്തിവെച്ചു. വിജയ് നായകനായ ജനനായകൻ ഉൾപ്പെടെയുള്ള തമിഴ് സിനിമകളുടെ പ്രദർശനം ഇനിയൊരു അറിയിപ്പ് ഉണ്ടാകുന്നതുവരെ നിർത്തിവെക്കുകയാണെന്ന് തിയേറ്റർ അധികൃതർ അറിയിച്ചു.
പ്രതിഷേധം ശക്തമാകുന്നതിനാൽ മുൻകരുതൽ നടപടിയായി നിരവധി തിയേറ്ററുടമകൾ ജനനായകൻ പ്രദർശനം സ്വമേധയാ നിർത്തിവെച്ചു. വിജയ്‌യുടെ പോസ്റ്ററുകൾ, ബാനറുകൾ, കട്ടൗട്ടുകൾ എന്നിവ തിയേറ്റർ പരിസരത്ത് നിന്നും നീക്കം ചെയ്തു. മാണ്ഡ്യയിലും ചാമരാജനഗറിലും തമിഴ് സിനിമകളുടെ പ്രദർശനം കന്നഡ അനുകൂല സംഘടനകൾ തടസ്സപ്പെടുത്തിയതിനെത്തുടർന്നാണ് കർണാടക ഫിലിം എക്സിബിറ്റേഴ്‌സ് അസോസിയേഷൻ സംസ്ഥാനവ്യാപകമായി തമിഴ് സിനിമകളുടെ പ്രദർശനം നിർത്തിവെച്ചത്.
മാണ്ഡ്യയിൽ തമിഴ് സിനിമകൾ പ്രദർശിപ്പിക്കുന്ന തിയേറ്ററിന് പുറത്ത് പ്രതിഷേധക്കാർ തടിച്ചുകൂടി. പ്രകടനക്കാരെ തിയേറ്ററിൽ പ്രവേശിക്കുന്നത് പോലീസ് തടഞ്ഞു. അതേസമയം, ഷെഡ്യൂൾ ചെയ്ത ഷോകൾക്ക് പകരം കന്നഡ സിനിമകൾ പ്രദർശിപ്പിക്കാനുള്ള തീരുമാനത്തിലാണ് തിയേറ്റർ ഉടമകൾ. അനിഷ്ട സംഭവങ്ങൾ ഉണ്ടാകാതിരിക്കാൻ മുൻകരുതൽ നടപടിയായി തിയേറ്ററിന് പുറത്ത് പോലീസ് ഉദ്യോഗസ്ഥരെ വിന്യസിച്ചിട്ടുണ്ട്. ജൂലൈ 23ന് റിലീസ് ചെയ്ത ജനനായകൻ കർണാടകയിലെ 150- ഓളം തിയേറ്ററുകളിൽ പ്രദർശിപ്പിച്ചിരുന്നു.
15 ദിവസത്തേക്ക് തമിഴ്‌നാടിന് 3,500 ക്യുസെക്‌സ് വെള്ളം വിട്ടുകൊടുക്കാൻ കർണാടകയോട് നിർദ്ദേശിച്ച കാവേരി ജല നിയന്ത്രണ അതോറിറ്റിയുടെ (സിഡബ്ല്യുആർഎ) ഉത്തരവിനെതിരെയാണ് പ്രതിഷേധം. വെള്ളം വിട്ടുകൊടുക്കാനുള്ള ഉത്തരവിനെതിരെ കന്നഡ അനുകൂല സംഘടനകൾ പ്രക്ഷോഭം ശക്തമാക്കിയിട്ടുണ്ട്. ഓഗസ്റ്റ് 13ന് കന്നഡ സംഘടനകൾ സംസ്ഥാനവ്യാപകമായി ബന്ദിന് ആഹ്വാനം ചെയ്തു.
