[Photo Courtesy : AajTak/X]
ന്യൂഡൽഹി : തെക്കൻ ഡൽഹി മാളവ്യ നഗറിലെ ‘ഫ്ലറിഷ് സ്റ്റേ ബി ആൻഡ് ബി’ ഹോട്ടലിലുണ്ടായ തീപിടുത്തത്തിൽ ഒരു കുടുംബത്തിലെ എട്ട് പേർക്ക് ദാരുണാന്ത്യം. ഗുരുഗ്രാം നിവാസികളായ അഗർവാൾ കുടുംബത്തിലെ രണ്ട് തലമുറകളിൽപ്പെട്ട അംഗങ്ങളാണ് മരിച്ചത്. 48 കാരനായ വിവേക് അഗർവാൾ, ഭാര്യ തർജ്നി അഗർവാൾ, ഇവരുടെ മക്കളായ ജിവിഷ (ഏഞ്ചൽ), വര്യ (പേൾ) എന്നിവരും ഝാവേരി, അശോക് അഗർവാൾ, കമല, പ്രേം ലത അഗർവാൾ എന്നീ കുടുംബാംഗങ്ങളുമാണ് മരിച്ചത്. സാകേതിലെ മാക്സ് ഹോസ്പിറ്റലിൽ ശ്വാസകോശ സംബന്ധമായ അസുഖത്തെ തുടർന്ന് ചികിത്സയിൽ കഴിയുന്ന വിവേകിന്റെ പിതാവ് രാധേശ്യാം അഗർവാളിനെ പരിചരിക്കുന്നതിനായാണ് ‘ഫ്ലറിഷ് സ്റ്റേ ബി ആൻഡ് ബി’ എന്ന ഹോട്ടലിൽ ഇവർ മുറിയെടുത്തത്.
അസുഖബാധിതനായ രാധേശ്യാമിനെ കാണാനും കുടുംബത്തോടൊപ്പം സമയം ചിലവഴിക്കാനുമാണ് ബന്ധുക്കൾ ഡൽഹിയിലെത്തിയതെന്ന് തർജ്നിയുടെ മാതുലൻ അജയ് ഗുപ്ത മാധ്യമങ്ങളോട് പറഞ്ഞു. ഒരു മെഡിക്കൽ അടിയന്തിര ഘട്ടത്തിൽ പ്രിയപ്പെട്ടവർക്ക് പിന്തുണ നൽകാനെത്തിയവരെ ഒന്നടങ്കം വലിയൊരു ദുരന്തം കവർന്നെടുക്കുകയായിരുന്നു. ഒരൊറ്റ രാത്രി കൊണ്ട് തങ്ങളുടെ കുടുംബത്തിലെ ഒരു തലമുറ മുഴുവൻ ഇല്ലാതായി എന്ന സത്യം ഉൾക്കൊള്ളാൻ ബന്ധുക്കൾക്ക് ഇപ്പോഴും സാധിച്ചിട്ടില്ല. നിലവിൽ ആശുപത്രിയിൽ ചികിത്സയിൽ കഴിയുന്ന രാധേശ്യാം തന്റെ ഭാര്യയും മകനും മരുമകളും രണ്ട് പേരക്കുട്ടികളും ഉൾപ്പെടെ തന്നെ കാണാനെത്തിയ എട്ട് പ്രിയപ്പെട്ടവരും ഈ ലോകത്തോട് വിടപറഞ്ഞു എന്ന ദാരുണ സത്യം ഇപ്പോഴും അറിഞ്ഞിട്ടില്ല എന്നതാണ് സങ്കടകരമായ കാര്യം..
ഒൻപത് ഇന്ത്യക്കാരും 12 വിദേശികളുമടക്കം 21 പേർക്കാണ് തീപിടുത്തത്തിൽ ജീവൻ നഷ്ടമായത്. അപകടത്തിന്റെ യഥാർത്ഥ കാരണത്തെക്കുറിച്ച് നിലവിൽ അന്വേഷണം പുരോഗമിക്കുകയാണ്. രാവിലെ 8:30 ഓടെയാണ് ഹോട്ടലിൽ തീപിടുത്തമുണ്ടായത്. ഒരൊറ്റ പ്രവേശന-പുറത്തുകടക്കൽ കവാടം മാത്രമുള്ള, ജനലുകൾ പൂർണ്ണമായി അടച്ചുപൂട്ടിയ, സെൻസർ വഴി പ്രവർത്തിക്കുന്ന പ്രധാന വാതിലുള്ള അഞ്ച് നിലകളുള്ള ഇടുങ്ങിയ കെട്ടിടത്തിലേക്ക് തീ വളരെ വേഗത്തിൽ പടരുകയായിരുന്നു എന്ന് അധികൃതർ വ്യക്തമാക്കി.
തീപിടുത്തത്തെക്കുറിച്ച് നടത്തിയ പ്രാഥമിക അന്വേഷണത്തിൽ കടുത്ത സുരക്ഷാ വീഴ്ചയും നിയമലംഘനങ്ങളുമാണ് കണ്ടെത്തിയിട്ടുള്ളത്. ഹോട്ടലിന്റെ താഴത്തെ നിലയിൽ ലൈസൻസില്ലാത്ത റെസ്റ്റോറന്റ് പ്രവർത്തിച്ചിരുന്നതായും, ബേസ്മെന്റിലെ ഗ്രില്ലുകൾ പൂട്ടിക്കിടക്കുകയായിരുന്നുവെന്നും കണ്ടെത്തിയിട്ടുണ്ട്. കൂടാതെ അപകടസമയത്ത് പുറത്തുകടക്കാനുള്ള കൃത്യമായ വഴികളോ വായുസഞ്ചാരമുള്ള ജനലുകളോ കെട്ടിടത്തിൽ ഉണ്ടായിരുന്നില്ല.
ഇതിനുപുറമെ കടുത്ത ജനസാന്ദ്രതയുള്ള പ്രദേശത്താണ് ഹോട്ടൽ സ്ഥിതി ചെയ്യുന്നത് എന്നതും, കെട്ടിടത്തിന് ചുറ്റും വൈദ്യുതി ലൈനുകൾ ഒട്ടേറെ ഉണ്ടായിരുന്നു എന്നതും അഗ്നിശമന രക്ഷാപ്രവർത്തനങ്ങൾക്ക് വലിയ തടസ്സം സൃഷ്ടിക്കുകയും രക്ഷാപ്രവർത്തനം വൈകിക്കുകയും ചെയ്തിട്ടുണ്ട്. ഹോട്ടൽ അതിന്റെ അനുവദിച്ച ശേഷിയേക്കാൾ വളരെ കൂടുതൽ മുറികൾ പ്രവർത്തിപ്പിച്ചിരുന്നതായും അന്വേഷണത്തിൽ വ്യക്തമായിട്ടുണ്ട്. ബെഡ് ആൻഡ് ബ്രേക്ക്ഫാസ്റ്റ് നയപ്രകാരം വെറും ആറ് മുറികൾ മാത്രം പ്രവർത്തിപ്പിക്കാൻ അനുവാദമുള്ള ഈ കെട്ടിടത്തിൽ 25 മുറികളാണ് പ്രവർത്തിച്ചിരുന്നത്.
