കൊച്ചി : ഗവർണറുടെ പരിപാടിക്ക് വേണ്ടി പുറത്തിറക്കിയ വിവാദ സർക്കുലർ പിൻവലിച്ച് തടിയൂരി കാലടി സർവ്വകലാശാല. പരിപാടിക്കായി സർവ്വകലാശാലയിൽ ഗവർണർ എത്തുമ്പോഴും മടങ്ങുമ്പോഴും എല്ലാവരും എഴുന്നേറ്റ് നിൽക്കണമെന്നും പ്രസംഗം അവസാനിക്കുമ്പോൾ കയ്യടിക്കണമെന്നുമുള്ള നിർദ്ദേശങ്ങളടങ്ങിയതായിരുന്നു സർക്കുലർ.
ശങ്കരജയന്തി ആഘോഷവുമായി ബന്ധപ്പെട്ട് പുറത്തിറക്കിയ സർക്കുലറാണ് കാലടി സംസ്കൃത സർവ്വകലാശാല പിൻവലിച്ചത്. ശ്രീ ശങ്കര ജയന്തിയുടെ ഭാഗമായി 21ന് രാവിലെയാണ് ഗവർണർ സർവ്വകലാശാലയിൽ എത്തുന്നത്. ഇതിന് മുന്നോടിയായാണ് സർവ്വകലാശാല കർശന നിർദ്ദേശങ്ങൾ അടങ്ങിയ സർക്കുലർ പുറത്തിറക്കിയത്. മൊബൈൽ ഫോണുകൾ സൈലന്റ് മോഡിലാക്കണമെന്നും പ്രസംഗത്തിനിടെ അനാവശ്യ ചലനങ്ങൾ ഒഴിവാക്കണമെന്നും ഗവർണർ മടങ്ങും വരെ ആരും ഹാൾ വിട്ടു പുറത്ത് പോകരുതെന്നും സർക്കുലറിൽ സർവ്വകലാശാല നിർദ്ദേശിച്ചിരുന്നു
