കൊച്ചി : കേരളത്തിൽ എയിംസ് വേണമെന്ന ആവശ്യത്തിൽ കേന്ദ്രം കൈക്കൊള്ളുന്നനിലപാടിൽ അതൃപ്തിയറിയിച്ച് ഹൈക്കോടതി. സംസ്ഥാനം നിർദ്ദേശിച്ച സ്ഥലത്ത് സാദ്ധ്യതാ പഠനം നടത്തണമെന്നുള്ള ഹൈക്കോടതി നിർദ്ദേശത്തിൽ മറുപടി നൽകാൻ നാല് ആഴ്ച സമയം വേണമെന്ന കേന്ദ്ര സർക്കാർ ആവശ്യം കോടതി തള്ളി. അത്രയും സമയം നൽകാൻ ആവില്ലെന്ന് കോടതി പറഞ്ഞു.
എയിംസ് കേരളത്തിൽ സ്ഥാപിക്കാൻ തീരുമാനം എടുത്തിട്ടില്ലേ എന്നും എന്തുകൊണ്ടാണ് തീരുമാനം നീണ്ടുപോകുന്നതെന്നും കേന്ദ്രത്തോട് കോടതി ചോദിച്ചു. രണ്ടാഴ്ച സമയം നൽകിയിട്ടുണ്ടെന്നും കേന്ദ്ര ആരോഗ്യ മന്ത്രാലയത്തിന്റെ പ്രതിനിധി ഓൺലൈൻ ആയി ഹാജരാവണമെന്നും സാദ്ധ്യതാ പഠനം സംബന്ധിച്ച് മറുപടി നൽകണമെന്നുമാണ് കോടതി നിർദ്ദേശം.
