ന്യൂഡൽഹി : ദേശീയ സുരക്ഷാ ഉപദേഷ്ടാവ് അജിത് ഡോവൽ, റോ മുൻ മേധാവി സാമന്ത് ഗോയൽ തുടങ്ങിയ ഉദ്യോഗസ്ഥർക്കെതിരെയുള്ള കേസിൽ ഇന്ത്യയ്ക്ക് സമൻസ് അയച്ച് യുഎസ് സ്റ്റേറ്റ് ഡിപ്പാർട്ട്‌മെന്റ. ഖലിസ്ഥാൻ നേതാവ് ഗുർപർവന്ത് സിങ് പന്നു നൽകിയ കേസിലാണ് സമൻസ്. വാഷിങ്ടണിലെ ഇന്ത്യൻ എംബസിക്ക് ഒക്ടോബർ ഒൻപതിനാണ് സമൻസ് കൈമാറിയത്.
2023-ൽ ന്യൂയോർക്കിൽ വെച്ച് പന്നുവിനെ വധിക്കാൻ ഗൂഢാലോചന നടത്തിയെന്നതാണ് കേസ്. ഇന്ത്യൻ പൗരനായ നിഖിൽ ഗുപ്ത ഉൾപ്പെട്ടതായി ആരോപിക്കപ്പെടുന്ന ഗൂഢാലോചനയിലാണ് പന്നു കോടതിയെ സമീപിച്ചത്. കേസിൽ അജിത് ഡോവൽ, മുൻ റോ മേധാവി സാമന്ത് ഗോയൽ തുടങ്ങിയവരുടെ പേരുകളും ഉൾപ്പെടുത്തിയിട്ടുണ്ട്. ഗൂഢാലോചനയുമായി ബന്ധപ്പെട്ട് 2023 ജൂണിൽ ചെക്ക് റിപ്പബ്ലിക്കിൽ അറസ്റ്റിലായ നിഖിൽ ഗുപ്തയെ യുഎസിന് കൈമാറിയിരുന്നു.
2026 ഫെബ്രുവരിയിൽ വാടക കൊലപാതകത്തിനുള്ള ഗൂഢാലോചന, കൊലപാതകത്തിനുള്ള ഗൂഢാലോചന, പണം വെളുപ്പിക്കാനുള്ള ഗൂഢാലോചന തുടങ്ങിയ മൂന്ന് കുറ്റങ്ങൾ ഗുപ്ത സമ്മതിച്ചു. അതേസമയം, സമൻസ് കൈമാറിയത് നിയമപരമായ നടപടിക്രമത്തിന്റെ ഭാഗം മാത്രമാണെന്നും കേസിലെ ആരോപണങ്ങളിൽ യുഎസ് നിലപാട് സ്വീകരിച്ചതായി ഇതിനെ വ്യാഖ്യാനിക്കരുതെന്നും സ്റ്റേറ്റ് ഡിപ്പാർട്ട്‌മെന്റ് വ്യക്തമാക്കി.
കേസിൽ ഇന്ത്യൻ ഉദ്യോഗസ്ഥർക്ക് പങ്കുണ്ടെന്ന ആരോപണം ഇന്ത്യ നേരത്തേ നിഷേധിച്ചിരുന്നു. സംഭവത്തിൽ അമേരിക്കൻ അന്വേഷണ ഏജൻസികൾ കൈമാറിയ വിവരങ്ങൾ പരിശോധിക്കാൻ 2023ൽ ഇന്ത്യ അന്വേഷണ സമിതിയെ നിയോഗിക്കുകയും ചെയ്തിരുന്നു.
പന്നുവിനെ വധിക്കാനുള്ള ഗൂഢാലോചനയിൽ മുൻ റോ ഉദ്യോഗസ്ഥനായ വികാഷ് യാദവിന് പങ്കുണ്ടെന്നാണ് യുഎസ് അന്വേഷണ ഏജൻസികളുടെ ആരോപണം. എന്നാൽ, മുതിർന്ന ഇന്ത്യൻ ഉദ്യോഗസ്ഥർക്കെതിരായ ആരോപണങ്ങളും കേസുകളും കെട്ടിച്ചമച്ചതും ദുരുദ്ദേശ്യപരവുമാണെന്ന് വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ പറഞ്ഞു.
