തൊടുപുഴ: പീരുമേട് കനത്ത മഴ തുടരുന്ന സാഹചര്യത്തിൽ ഇടുക്കി കൊക്കയാറിൽ ഉരുൾപൊട്ടൽ, മണ്ണിടിച്ചിൽ സാദ്ധ്യതാ മേഖലകളിൽ താമസിക്കുന്നവരെ ജില്ലാ ഭരണകൂടം മാറ്റി പാർപ്പിക്കും. 10 കുടുംബങ്ങളെ മാറ്റാനായി ക്യാമ്പ് തുറന്നു. ശനിയാഴ്ച ഉച്ചതിരിഞ്ഞ് പീരുമേട് ഭാഗത്ത് കനത്ത മഴയാണ് പെയ്യുന്നത്. 18 മില്ലിമീറ്റർ മഴയാണ് ഇന്ന് ഇവിടെ രേഖപ്പെടുത്തിയത്.
രണ്ട് ദിവസത്തേക്ക് മാത്രമായാണ് താൽക്കാലിക ക്യാമ്പ് തുറന്നത്. തിങ്കളാഴ്ചയോടെ മേഖലയിൽ മഴ കുറയുമെന്നാണ് കാലാവസ്ഥ വകുപ്പിന്റെ പ്രവചനം. 35 പേരാണ് ക്യാമ്പുകളിലേക്ക് മാറാൻ തയ്യാറെടുക്കുന്നത്. ആവശ്യമെങ്കിൽ കൂടുതൽ പേരെ മാറ്റാനുള്ള സൗകര്യങ്ങൾ ഒരുക്കുമെന്ന് അധികൃതർ അറിയിച്ചു.
