[Photo Courtesy : IPL]
അഹമ്മദാബാദ് : അമ്പയർ നിതിൻ മേനോന് നേരെ ഐസ് ബാഗ് എറിഞ്ഞ സംഭവവുമായി ബന്ധപ്പെട്ട് റോയൽ ചലഞ്ചേഴ്‌സ് താരം ടീം ഡേവിഡിന് ഒരു മത്സരത്തിൽ നിന്ന് സസ്‌പെൻഷൻ. അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ ഗുജറാത്ത് ടൈറ്റൻസിനെതിരായി നടന്ന ഐപിഎൽ 2026 ഫൈനലിനിടെയായിരുന്നു സംഭവം.
ഒരു മത്സരത്തിൽ നിന്ന് സസ്‌പെൻഷൻ ലഭിച്ചതിനെ തുടർന്ന് ഐപിഎൽ 2027 ലെ റോയൽ ചലഞ്ചേഴ്‌സ് ബംഗളൂരുവിന്റെ ഉദ്ഘാടന മത്സരം ടീം ഡേവിഡിന് നഷ്ടമാകും.
അടുത്ത സീസണിൽ അദ്ദേഹം മറ്റൊരു ഫ്രാഞ്ചൈസിയെ പ്രതിനിധീകരിക്കുകയാണെങ്കിൽ, ആ ടീമിന്റെ ഓപ്പണിംഗ് മത്സരത്തിൽ സസ്‌പെൻഷൻ നടപ്പിലാക്കും.
ലെവൽ 1 കുറ്റത്തിന് ഡേവിഡിന് മാച്ച് ഫീയുടെ 50 ശതമാനം പിഴയും രണ്ട് ഡീമെറിറ്റ് പോയിന്റുകളും നൽകിയതായി ഐപിഎൽ അധികൃതർ തിങ്കളാഴ്ച അറിയിച്ചു. ഒരു മത്സരത്തിനിടെ അനുചിതമായതോ അപകടകരമോ ആയ രീതിയിൽ ഒരു കളിക്കാരൻ, ടീം ഒഫീഷ്യൽ, അമ്പയർ, മാച്ച് റഫറി അല്ലെങ്കിൽ മറ്റേതെങ്കിലും വ്യക്തിക്ക് നേരെയോ അല്ലെങ്കിൽ സമീപത്തോ പന്ത് അല്ലെങ്കിൽ ക്രിക്കറ്റ് ഉപകരണങ്ങളുടെ മറ്റേതെങ്കിലും ഇനം എറിയുന്നത് സംബന്ധിച്ച ഐപിഎൽ പെരുമാറ്റച്ചട്ടത്തിലെ ആർട്ടിക്കിൾ 2.9 ലംഘിച്ചതിന് ഓസ്ട്രേലിയൻ താരം കുറ്റക്കാരനാണെന്ന് കണ്ടെത്തുകയായിരുന്നു.
ആദ്യ ഇന്നിംഗ്‌സിലെ പത്താം ഓവറിലായിരുന്നു സംഭവം. വിക്കറ്റ് നഷ്ടപ്പെട്ടപ്പോൾ ഡേവിഡ് അമ്പയർ നിതിൻ മേനോന് നേരെ ആക്രമണാത്മകമായി ഒരു ഐസ് ബാഗ് എറിഞ്ഞിരുന്നു. ഡേവിഡ് കുറ്റം സമ്മതിക്കുകയും മാച്ച് റഫറി ജവഗൽ ശ്രീനാഥ് ഏർപ്പെടുത്തിയ ശിക്ഷ സ്വീകരിക്കുകയും ചെയ്തു.
ഉടനടി ലഭിച്ച പെനാൽറ്റി പിഴയും രണ്ട് ഡീമെറിറ്റ് പോയിന്റുകളുമായിരുന്നു. എന്നാൽ ഡേവിഡിന്റെ സീസണിലെ മൂന്നാമത്തെ ലെവൽ 1 കുറ്റകൃത്യമായതിനാൽ ഈ ലംഘനം കൂടുതൽ പ്രത്യാഘാതങ്ങൾ സൃഷ്ടിച്ചു. നേരത്തെ മാച്ച് 20-ൽ ഒരു ഡീമെറിറ്റ് പോയിന്റും മാച്ച് 54-ൽ രണ്ട് ഡീമെറിറ്റ് പോയിന്റും അദ്ദേഹത്തിന് ലഭിച്ചിരുന്നു.
