പത്തനംതിട്ട : പത്തനംതിട്ടയിൽ 13 വയസ്സുകാരിയായ സ്‌ക്കൂൾ വിദ്യാർത്ഥിനിയെ സഹപാഠികൾ ചേർന്ന് പീഡിപ്പിച്ചതായി പരാതി. സ്കൂളിലെ കൗൺസിലിങ്ങിനിടെയാണ് ഒൻപതാം ക്ലാസ്സ് വിദ്യാർത്ഥിനിയുടെ ഞെട്ടിക്കുന്ന വെളിപ്പെടുത്തൽ. സ്കൂൾ വളപ്പിലും ഒരു തവണ, പെൺകുട്ടിയുടെ സഹപാഠിയും പ്രതികളിലൊരാളുമായ പെൺകുട്ടിയുടെ വീട്ടിൽ വെച്ചുമാണ് പീഡനം നടന്നതെന്നാണ് പെൺകുട്ടി പറയുന്നത്. പത്തനംതിട്ട കൂടൽ പോലീസ് സ്റ്റേഷൻ പരിധിയിലാണ് സംഭവം.
ഒൻപതാം ക്ലാസ് വിദ്യാർത്ഥിനിയായ പെൺകുട്ടിയുടെ മൊഴിയുടെ അടിസ്ഥാനത്തിൽ സഹപാഠികളായ ആറ് പ്രായപൂർത്തിയാകാത്ത കുട്ടികൾക്കെതിരെ പോലീസ് രണ്ടു കേസുകൾ രജിസ്റ്റർ ചെയ്തു.
സംഭവത്തിൽ കൂടുതൽ പേർക്ക് പങ്കുണ്ടോ എന്ന് പോലീസ് പരിശോധിക്കുന്നുണ്ട്.
പ്രതികളായ കുട്ടികളെ പോലീസ് തിരിച്ചറിഞ്ഞിട്ടുണ്ട്. ശിശുക്ഷേമ സമിതി അംഗങ്ങളുടെ സഹായത്തോടെ ഇവരുടെ മൊഴി രേഖപ്പെടുത്തുമെന്ന് ഉദ്യോഗസ്ഥർ പറഞ്ഞു. ഇവരെ കൂടാതെ ഈ സംഭവവുമായി ബന്ധപ്പെട്ട് മറ്റ് രണ്ട് പേരെ കൂടി ചോദ്യം ചെയ്യുന്നുണ്ടെന്ന് പോലീസ് അറിയിച്ചു.
