ദുബൈ : ദുബൈയിൽ എമിറേറ്റ്സ് റോഡിലുണ്ടായ വാഹനാപകടത്തിൽ എട്ട് പേർക്ക് ദാരുണാന്ത്യം. മരിച്ചവരിൽ 6 പേർ ഇന്ത്യക്കാരാണ്. അപകടസമയത്ത് മിനി ബസ്സിൽ ഡ്രൈവർ ഉൾപ്പെടെ 16 പേരാണ് ഉണ്ടായിരുന്നത്. പരിക്കേറ്റ് ആശുപത്രിയിൽ ചികിത്സയിലുള്ള എട്ട് പേരിൽ 4 പേരുടെ നില ഗുരുതരമാണ്. പരിക്കേറ്റവരിലും രണ്ട് പേർ ഇന്ത്യക്കാരാണ്.
യന്ത്രതകരാറിനെ തുടർന്ന് റോഡിൽ നിർത്തിയിട്ടിരുന്ന ട്രക്കിന് പിന്നിൽ ഒരു മിനി ബസ് അതിവേഗത്തിൽ വന്നിടിക്കുകയായിരുന്നു. പ്രാദേശിക സമയം ഉച്ചയ്ക്കായിരുന്നു അപകടം. മുൻപിലുള്ള വാഹനവുമായി നിശ്ചിത അകലം പാലിക്കണമെന്ന സുരക്ഷാ നിർദ്ദേശം മിനി ബസ് ഡ്രൈവർ പാലിക്കാത്തതാണ് ഇത്രയും വലിയ അപകടത്തിന് കാരണമായതെന്നാണ് ദുബൈ പോലീസിൻ്റെ വിലയിരുത്തൽ
