ന്യൂഡൽഹി : ഓണം അഘോഷിക്കാൻ കേരളത്തിലെ കേന്ദ്രസർക്കാർ ജീവനക്കാർക്കും പെൻഷൻകാർക്കും ഓഗസ്റ്റ് മാസത്തെ ശമ്പളവും പെൻഷനും മുൻകൂറായി നൽകും. അതനുസരിച്ച്, ഓഗസ്റ്റ് 24-ന് തിങ്കളാഴ്ച തന്നെ സംസ്ഥാനത്തെ കേന്ദ്രസർക്കാർ ഓഫീസുകളിൽ ശമ്പളം വിതരണം ചെയ്യുമെന്നാണ ഉത്തരവ്. കേന്ദ്ര ധനമന്ത്രാലയത്തിന്റെ എക്സ്പെൻഡിച്ചർ ഡിപ്പാർട്ടുമെന്റിൻ്റെതാണ് ഉത്തരവ്. കേരളത്തിലെ എല്ലാ കേന്ദ്രസർക്കാർ പെൻഷൻകാരുടെയും 2026 ഓഗസ്റ്റ് മാസത്തെ പെൻഷൻ ബാങ്കുകൾ/പി.എ.ഒ (PAO)-കൾ വഴി ഓഗസ്റ്റ് 24-ന് വിതരണം ചെയ്യാവുന്നതാണെന്നും ഉത്തരവ് വ്യക്തമാക്കുന്നു.
ഇത്തരത്തിൽ വിതരണം ചെയ്യുന്ന ശമ്പളം, വേതനം, പെൻഷൻ എന്നിവ അഡ്വാൻസ് തുകയായി കണക്കാക്കുക. ഓരോ ജീവനക്കാരന്റെയും പെൻഷൻകാരന്റെയും മുഴുവൻ മാസത്തെ ശമ്പളം, പെൻഷൻ എന്നിവ നിർണ്ണയിച്ച ശേഷം അഡ്ജസ്റ്റ്മെന്റ് ചെയ്യും. ഏതെങ്കിലും തരത്തിലുള്ള മറ്റ് അഡ്ജസ്റ്റ്മെന്റ്സ് ഉണ്ടെങ്കിൽ, അത് 2026 ഓഗസ്റ്റ് മാസത്തെ ശമ്പളത്തിൽ നിന്നോ പെൻഷനിൽ നിന്നോ തന്നെ നടത്തുന്നതായിരിക്കുമെന്നും എക്സ്പെൻഡിച്ചർ ഡിപ്പാർട്ടുമെന്റ് അറിയിച്ചു. ജോയിന്റ് കൺട്രോളർ ജനറൽ ഓഫ് അക്കൗണ്ട്സ് സഞ്ജിത ശുക്ലയുടേതാണ് ഉത്തരവ്.
