പത്തനംതിട്ട: ബിജെപി ഭരിക്കുന്ന പന്തളം നഗരസഭയിൽ ചെയർപേഴ്സണും ഡെപ്യൂട്ടി ചെയർപേഴ്സണും രാജിവെച്ചു. മൂന്ന് വിമത ബിജെപി അംഗങ്ങളെ കൂട്ടുപിടിച്ച് എൽഡിഎഫ് കൊണ്ടുവന്ന അവിശ്വാസ പ്രമേയം നാളെ പരിഗണിക്കാനിരിക്കെയാണ് രണ്ടു പേരുടെയും രാജി. ചെയർപേഴ്സൺ സുശീല സന്തോഷും ഡെപ്യൂട്ടി ചെയർപേഴ്സൺ യു രമ്യയുമാണ് രാജിവെച്ചത്. എൽഡിഎഫിൻ്റെ അവിശ്വാസത്തെ യുഡിഎഫും പിന്തുണച്ചിരുന്നു.
അംഗങ്ങൾ രാജി വെച്ചതിൽ ആഹ്ളാദം പ്രകടിപ്പിച്ച് പന്തളത്ത് എൽഡിഎഫ് പടക്കം പൊട്ടിച്ചു. രാജി ജനാധിപത്യത്തിൻ്റെ വിജയമെന്ന് യുഡിഎഫ് അംഗങ്ങളും പ്രതികരിച്ചു. വ്യക്തിപരമായ അസൗകര്യം കൊണ്ടാണ് രാജിയെന്ന് സുശീല സന്തോഷ് പറഞ്ഞു. ബിജെപിയിലെ ആഭ്യന്തര തർക്കങ്ങളെ തുടർന്ന് പന്തളം നഗരസഭയിൽ മൂന്ന് ബിജെപി അംഗങ്ങൾ ഉയർത്തിയ കലാപക്കൊടിയാണ് അവിശ്വാസത്തിലേക്ക് വഴി നയിച്ചത്.
വ്യക്തിപരായ കാരണം കൊണ്ടാണ് സുശീലയും രമ്യയും രാജിവെച്ചതൊന്നും നഗരസഭ ബിജെപി തന്നെ ഭരിക്കുമെന്നും ബിജെപി ജില്ലാ പ്രസിഡൻ്റ് വി എ സൂരജ് പറഞ്ഞു. പാർട്ടി രാജി ആവശ്യപ്പെട്ടിട്ടില്ലെന്നും ഇരുവരും രാജി സന്നദ്ധത അറിയിച്ചത് പാർട്ടി അംഗീകരിക്കുകയായിരുന്നുവെന്നും ഭരണത്തിൽ തിരിച്ചെത്തുമെന്നും സൂരജ് കൂട്ടിച്ചേർത്തു.
