മൈസൂരു : മൈസൂരുവിനടുത്ത് സ്വകാര്യ എസി സ്ലീപ്പർ ബസും ലോറിയും കൂട്ടിയിടിച്ചുണ്ടായ അപകടത്തിൽ മലയാളികളക്കം നാലുപേർക്ക് ദാരുണാന്ത്യം. കോഴിക്കോട് നിന്ന് ബംഗളൂരുവിലേക്ക് വരികയായിരുന്ന ‘കാവേരി’ എ സി സ്ലീപ്പർ ബസാണ് അപകടത്തിൽപ്പെട്ടത്. പെരിയപട്ടണം പൊലീസ് സ്റ്റേഷൻ പരിധിയിൽ ഇന്ന് പുലർച്ചെ 3.45 ഓടെയാണ് അപകടം.
അപകടത്തിൽ ബസിന്റെ ഡ്രൈവറടക്കം 4 പേർ മരിച്ചതായും മുപ്പതോളം പേർക്ക് പരുക്കേറ്റതായുമാണ് വിവരം. ബസില്‍ 30 ഓളം പേരാണ് ഉണ്ടായിരുന്നത്. പരിക്കേറ്റ 15 ഓളം പേരെ പെരിയപട്ടണയിലെയും മൈസൂരുവിലെയും ആശുപത്രികളില്‍ പ്രവേശിപ്പിച്ചു. ഡ്രൈവര്‍ മൈസൂരു സ്വദേശി സുനില്‍, ബസ് ക്ലീനര്‍ മലയാളി സുഹൈല്‍, കോഴിക്കോട് മാങ്കാവ് സ്വദേശി സജേഷ്, ബേപ്പൂര്‍ സ്വദേശി അഫ്താബ് എന്നിവരാണ് മരിച്ചത്. നാലു പേരുടെയും മൃതദേഹം പെരിയപട്ടണയിലെ ആശുപത്രിയിലാണ്.
റോഡിൽ മരം വീണു കിടന്നിരുന്നതിനാൽ ലോറി വലതുവശത്തേക്ക് വെട്ടിച്ചു മാറ്റിയപ്പോഴാണ് എതിർദിശയിൽ വന്ന ബസിലേക്ക് ഇടിച്ചുകയറിയതെന്നാണ് വിവരം.
