കൊച്ചി : നടിയെ ആക്രമിച്ച കേസിൽ കുറ്റകൃത്യത്തിന്റെ ദൃശ്യങ്ങൾ അടങ്ങിയ മെമ്മറി കാർഡ് ചോർന്ന കേസിൽ എസ്‌ഐടി അന്വേഷണം ആവശ്യപ്പെട്ട് അതിജീവിത സമർപ്പിച്ച ഹർജിയിൽ സംസ്ഥാന സർക്കാരിനോട് നിലപാട് തേടി ഹൈക്കോടതി. ഹർജി സ്വീകരിച്ച്
ജസ്റ്റിസ് സിഎസ് ഡയസ്, ഒരു മാസത്തിനുള്ളിൽ എതിർ സത്യവാങ്മൂലം സമർപ്പിക്കാൻ ആവശ്യപ്പെട്ട് സംസ്ഥാന സർക്കാരിന് നോട്ടീസ് അയച്ചു.
മെമ്മറി കാർഡും പെൻഡ്രൈവും സീൽ ചെയ്ത കവറിൽ കേരള ഹൈക്കോടതി രജിസ്ട്രാർ ജനറലിന് അയയ്ക്കാനും സീൽ ചെയ്ത കവർ ഇനിയൊരു ഉത്തരവ് ഉണ്ടാകുന്നതുവരെ രജിസ്ട്രാർ ജനറലിന്റെ കസ്റ്റഡിയിൽ സൂക്ഷിക്കാനും എറണാകുളം ജില്ലാ സെഷൻസ് കോടതിയോട് ഹൈക്കോടതി നിർദ്ദേശിച്ചു. മെമ്മറി കാർഡിലെ ഉള്ളടക്കം ചോർന്നതായി ആരോപിക്കപ്പെടുന്ന വിഷയത്തിൽ ഹൈക്കോടതിയുടെ മേൽനോട്ടത്തിലുള്ള പ്രത്യേക അന്വേഷണ സംഘത്തിന്റെ (എസ്‌ഐടി) പുതിയ അന്വേഷണം വേണമെന്ന് ആവശ്യപ്പെട്ടാണ് അതിജീവിത നർജി നൽകിയത്.
