തൃശ്ശൂര്‍ : സെമസ്റ്റര്‍ ഫീസ് കുത്തനെ ഉയര്‍ത്തി മണ്ണുത്തി കാര്‍ഷിക സര്‍വ്വകലാശാല. പിഎച്ച്ഡി, പിജി, ഡിഗ്രി വിദ്യാര്‍ത്ഥികളുടെ ഫീസുകള്‍ വന്‍ തോതിലാണ് വര്‍ദ്ധിപ്പിച്ചത്. കാര്‍ഷിക സര്‍വ്വകലാശാലയിലെ ധന പ്രതിസന്ധി മറികടക്കാനാണ് ഫീസ് വര്‍ദ്ധനയെന്നാണ് അധികൃതരുടെ വിശദീകരണം.
പിഎച്ച്ഡി വിദ്യാര്‍ത്ഥികളുടെ സെമസ്റ്റര്‍ ഫീസ് 18780-ൽ നിന്ന് 49990 ആയാണ് ഉയര്‍ത്തിയത്. പി.ജി വിദ്യാര്‍ഥികളുടേത് 17845 എന്നത് 49500 ആയും ഡിഗ്രി വിദ്യാര്‍ഥികളുടെ ഫീസ് 12000 എന്നതിൽ നിന്ന് 48000 രൂപയായും വർദ്ധിച്ചു.
വിദ്യാര്‍ത്ഥി സമരത്തെ തുടര്‍ന്ന് സര്‍വ്വകലാശാല എക്‌സിക്യൂട്ടീവുമായി ചര്‍ച്ച ചെയ്ത് മാത്രമേ ഫീസ് വര്‍ദ്ധിപ്പിക്കുകയുള്ളൂ എന്ന് സര്‍വ്വകലാശാല അധികൃതര്‍ വ്യക്തമാക്കിയിരുന്നതാണ്. ഈ ഉറപ്പ് പാലിക്കാതെയാണ് ഓണ അവധിക്ക് തൊട്ടുമുന്‍പ് ഫീസ് കുത്തനെ ഉയര്‍ത്തിയത്. സപ്തംബർ മൂന്നാം തീയതിയാണ് ഫീസ് വര്‍ദ്ധന സംബന്ധിച്ച ഉത്തരവിറങ്ങിയത്. ഇരട്ടിയിലേറെയുള്ള ഈ ഫീസ് വര്‍ദ്ധന താങ്ങാന്‍ കഴിയില്ലെന്നാണ് വിദ്യാര്‍ത്ഥി പക്ഷം.
