തിരുവനന്തപുരം: ഓണം വാരാഘോഷത്തോടനുബന്ധിച്ച് തലസ്ഥാനത്തിന്റെ ആകാശത്ത് ദൃശ്യവിസ്മയമൊരുക്കി ഡ്രോൺ ലൈറ്റ് ഷോ. ആയിരം ഡ്രോണുകൾ തീർത്ത ദൃശ്യവിരുന്നിൽ മാവേലി മന്നനും സാംസ്ക്കാരിക തനിമയാർന്ന കേരളത്തിൻ്റെ വിവിധ കലാരൂപങ്ങൾക്കുമൊപ്പം സംസ്ഥാനത്തിൻ്റെ വികസന മാതൃകയും ആകാശത്ത് മിന്നി മറഞ്ഞു. ഓണാഘോഷത്തിൻ്റെ ഭാഗമായി ടൂറിസം വകുപ്പാണ് ഡ്രോൺ ഷോ സംഘടിപ്പിച്ചത്.
യൂണിവേഴ്സിറ്റി സ്റ്റേഡിയത്തിനു മുകളിലായി 250 അടി ഉയരത്തിൽ രാത്രി 8.45 മുതൽ 9.15 വരെയാണ് ഡ്രോൺ ലൈറ്റ് ഷോ നടക്കുക. തലസ്ഥാനത്ത് ആദ്യമായാണ് കേരള ടൂറിസത്തിന്റെ നേതൃത്വത്തിൽ ഇത്തരമൊരു ലൈറ്റ് ഷോ സംഘടിപ്പിക്കുന്നത്. പ്രദർശനം ഞായറാഴ്ച വരെ നീണ്ടു നിൽക്കും. സ്റ്റേഡിയത്തിലും പരിസരപ്രദേശങ്ങളിലും ആകർഷകമായ ദൃശ്യവിസ്മയം കാണാം. എൽഇഡി ലൈറ്റുകളാൽ പ്രത്യേകം രൂപകൽപ്പന ചെയ്ത ഡ്രോണുകളാണ് ഷോയുടെ ഭാഗമാകുന്നത്. ആഗോള മുൻനിര ഡ്രോൺ ടെക്നോളജി കമ്പനിയായ ബോട്ട് ലാബ്‌ ഡൈനാമിക്സാണ് ലൈറ്റ് ഷോ ഒരുക്കുന്നത്.
