[Photo Courtesy : X]
ന്യൂഡൽഹി : ഒമാന്‍ തീരത്ത് കപ്പലിന് നേരെ വീണ്ടും ആക്രമണം. നിക്കരാഗ്വയുടെ പതാകയേന്തിയ എംടി പെട്രോ ഡോള്‍ഫിന്‍ എന്ന കപ്പലിന് നേരെയാണ് ഡ്രോണ്‍ ആക്രമണം ഉണ്ടായത്. സംഭവത്തില്‍ രണ്ട് ഇന്ത്യന്‍ നാവികരെ കാണാതായി. 11 ഇന്ത്യന്‍ ജീവനക്കാരായിരുന്നു കപ്പലില്‍ ഉണ്ടായിരുന്നത്. ഒന്‍പത് പേരെ രക്ഷപ്പെടുത്തി. സംഭവത്തില്‍ അന്വേഷണം തുടരുന്നതായി ഒമാനിലെ ഇന്ത്യന്‍ എംബസി അറിയിച്ചു.
ഇന്ത്യന്‍ ജീവനക്കാരുമായി സഞ്ചരിച്ച കപ്പലിന് നേരെ സോഹാര്‍ ആങ്കറേജില്‍ വെച്ച് ഡ്രോണ്‍ ആക്രമണമുണ്ടായതായി മന്ത്രി സര്‍ബാനന്ദ സോനോവാള്‍ എക്‌സിലൂടെ സ്ഥിരീകരിച്ചു. ഒമ്പത് ഇന്ത്യന്‍ ജീവനക്കാരെ വിജയകരമായി രക്ഷപ്പെടുത്തി സുരക്ഷിതമാക്കിയെന്ന് അറിയിച്ച മന്ത്രി, രണ്ട് ഇന്ത്യന്‍ പൗരന്മാരെ കാണാതായെന്നും വ്യക്തമാക്കി
പ്രാദേശിക കോസ്റ്റ് ഗാര്‍ഡിന്റെ നേതൃത്വത്തില്‍ തെരച്ചിലിനും രക്ഷാപ്രവര്‍ത്തനത്തിനുമുള്ള ശ്രമങ്ങള്‍ സജീവമായി നടന്നുവരികയാണെന്നും ഇന്ത്യക്കാരെ കണ്ടെത്തുന്നതിനായുള്ള രക്ഷാപ്രവര്‍ത്തനങ്ങളെ പൂര്‍ണ്ണമായി പിന്തുണയ്ക്കുന്നതിനും ആവശ്യമായ എല്ലാ നടപടികളും ഉറപ്പാക്കുന്നതിനും ബന്ധപ്പെട്ട എല്ലാ അധികാരികളുമായി നിരന്തരം ഏകോപനം നടത്തിവരികയാണെന്നും മന്ത്രി അറിയിച്ചു. സാഹചര്യങ്ങള്‍ സൂക്ഷ്മമായി നിരീക്ഷിച്ചുവരികയാണെന്ന് ഒമാനിലെ ഇന്ത്യന്‍ എംബസിയും അറിയിച്ചു. കാണാതായവരെ കണ്ടെത്താന്‍ ബന്ധപ്പെട്ട അധികാരികളുമായി നിരന്തരം സമ്പര്‍ക്കം പുലര്‍ത്തുന്നുണ്ടെന്നും എംബസി അറിയിച്ചു.
ആക്രമണത്തെ കേന്ദ്ര വിദേശകാര്യ മആക്രമണത്തെ കേന്ദ്ര വിദേശകാര്യ മന്ത്രാലയം അപലപിച്ചു. ഇന്ത്യന്‍ നാവികരുടെ സുരക്ഷയ്ക്കാണ് സര്‍ക്കാര്‍ പ്രഥമ പരിഗണന നല്‍കുന്നതെന്നും മേഖലയിലെ വാണിജ്യ കപ്പലുകള്‍ക്ക് നേരെ ആവര്‍ത്തിച്ചുണ്ടാകുന്ന ആക്രമണങ്ങള്‍ അതീവ ആശങ്കാജനകമാണെന്നും വിദേശകാര്യ മന്ത്രാലയം പ്രസ്താവനയില്‍ അറിയിച്ചു. ചര്‍ച്ചകളിലൂടെയും നയതന്ത്രത്തിലൂടെയും നിലവിലുള്ള സംഘര്‍ഷത്തിന് അടിയന്തരമായി പരിഹാരം കാണണമെന്നും ഇന്ത്യ ആവശ്യപ്പെട്ടു
