കൊച്ചി : റെയ്ഡിനിടെ പിടിച്ചെടുത്ത ഡോളർ തിരികെ നൽകണമെന്ന് ആവശ്യപ്പെട്ട് ജില്ലാ സെഷൻസ് കോടതിയെ സമീപിച്ച് റിപ്പോർട്ടർ ടിവി ഉടമ ആന്റോ അഗസ്റ്റിൻ. റെയ്ഡിനിടെ 6,500-ഓളം ഡോളറാണ് ആന്റോ അഗസ്റ്റിന്റെ പക്കൽനിന്ന് പിടിച്ചെടുത്തത്. ഈ പണം തിരികെ വേണമെന്നാണ് ആന്റോ അഗസ്റ്റിൻ
ആവശ്യപ്പെട്ടിരിക്കുന്നത്.
എന്നാൽ, ഈ പണം തിരികെ നൽകാൻ കഴിയില്ലെന്നാണ് പോലീസ് കോടതിയിൽ സ്വീകരിച്ചിരിക്കുന്ന നിലപാട്. പിടിച്ചെടുത്ത കറൻസികളിൽ ചിലത് വ്യാജമാണോ എന്നതുൾപ്പെടെയുള്ള കാര്യങ്ങളിൽ സംശയമുണ്ടെന്ന് സൂചിപ്പിക്കുന്ന റിപ്പോർട്ടാണ് പോലീസ് കോടതിയിൽ നൽകിയത്.
ഇതുമായി ബന്ധപ്പെട്ട വിവരങ്ങൾ ആദായനികുതി വകുപ്പിനും എൻഫോഴ്‌സ്‌മെന്റ് ഡയറക്ടറേറ്റിനും (ഇ.ഡി.) പോലീസ് കൈമാറിയിട്ടുണ്ട്. ഇതിനു പുറമേ, പോലീസും വിഷയം അന്വേഷിച്ചുവരികയാണ്. പരിശോധനകൾ പൂർത്തിയായ ശേഷം മാത്രമേ പണം തിരിച്ചുനൽകാൻ കഴിയൂ എന്ന നിലപാടാണ് പോലീസ് സ്വീകരിച്ചിട്ടുള്ളത്. കേസ് ഇന്ന് കോടതി പരിഗണിക്കുന്നുണ്ട്.
