തിരുവനന്തപുരം : സിഎംആർഎൽ-എക്സാലോജിക് കേസിൽ പിണറായി വിജയന് എൻഫോഴ്‌സ്‌മെന്റ് ഡയറക്ടറേറ്റിന്റെ സമൻസ്. അടുത്തയാഴ്ച ചോദ്യം ചെയ്യലിന് ഹാജരാകാനാണ് നിർദ്ദേശം. വീണയുടെ ഉടമസ്ഥതയിലുള്ള എക്സാലോജിക് സൊല്യൂഷൻസ് കമ്പനിക്ക് സർവ്വീസ് ലീഗൽ എഗ്രിമെന്റിലൂടെ മാസംതോറും മൂന്നുലക്ഷത്തിലധികം രൂപ 2017 മുതൽ 2019 വരെ സി.എം.ആർ.എൽ. നൽകിയെന്നാണ് ഇ.ഡി. റിപ്പോർട്ട്. ഐ.ടി. ആൻഡ് മാർക്കറ്റിങ് കൺസൾട്ടൻസി എന്ന നിലയിൽ ഇതേ കാലയളവിൽ വീണയ്ക്കും പ്രതിഫലം നൽകി. പ്രത്യേകിച്ച് സേവനമൊന്നും നൽകാതെത്തന്നെ 3.28 കോടി രൂപ വീണ കൈപ്പറ്റിയത് പിണറായി വിജയനുള്ള കൈക്കൂലിയായാണെന്നാണ് ഇ.ഡിയുടെ കണ്ടെത്തൽ.
ഇ.ഡിയുടെ റിപ്പോർട്ടിലാണ് വിജിലൻസ് എഫ്.ഐ.ആർ രജിസ്റ്റർ ചെയ്തത്. വിജിലൻസ് എഫ്.ഐ.ആർ റദ്ദാക്കണമെന്ന് ആവശ്യപ്പെട്ട് പിണറായി വിജയൻ ഉൾപ്പെടെയുള്ള പ്രതികൾ ഇന്ന് സുപ്രീം കോടതിയെ സമീപിച്ചിരുന്നു. ഇതിനിടെയാണ് ഇ.ഡിയുടെ സമൻസ്.
സിഎംആർ-എക്സാലോജിക് സാമ്പത്തിക ഇടപാടിൽ പ്രതിപക്ഷ നേതാവും മുൻ മുഖ്യമന്ത്രിയുമായ പിണറായി വിജയനെതിരെ വിജിലൻസ് കേസെടുത്തിരുന്നു. രണ്ട് എഫ്ഐആറുകളാണ് വിജിലൻസ് രജിസ്റ്റർ ചെയ്തത്. ആദ്യ കേസിൽ പ്രതിപക്ഷ നേതാവ് പിണറായി വിജയനും കള്ളപ്പണം വെളുപ്പിക്കൽ കേസിൽ മുഹമ്മദ് റിയാസുമാണ് ഒന്നാം പ്രതി. രണ്ട് കേസിലും ടി വീണ പ്രതിയാണ്. ഈ വിജിലൻസ് കേസിലെ നടപടികൾ സ്റ്റേ ചെയ്യണമെന്ന പിണറായി വിജയന്റെ ആവശ്യത്തിൽ വാദം കേൾക്കാൻ അടുത്ത ആഴ്ച പ്രത്യേക ബെഞ്ച് രൂപീകരിക്കുന്ന കാര്യം പരിഗണിക്കാമെന്ന് സുപ്രീം കോടതി അറിയിച്ചിരിക്കുന്നത്.
കേസിൽ പിണറായിയുടെ അറസ്റ്റിന് സാദ്ധ്യത ഉണ്ടെന്ന് അദ്ദേഹത്തിനു വേണ്ടി ഹാജരായ സീനിയർ അഭിഭാഷകൻ സിദ്ധാർത്ഥ് ലൂതറ ചൂണ്ടിക്കാട്ടിയിരുന്നു. പിണറായി വിജയന് 82 വയസ്സ് ആയെന്നും അതിനാൽ ഇന്നുതന്നെ കേസ് പരിഗണിച്ച് ഇടക്കാല സംരക്ഷണം നൽകണമെന്നുള്ള ആവശ്യവും ഇന്നയിച്ചിരുന്നു.
