തിരുവനന്തപുരം : സംസ്ഥാന വഖഫ് ബോർഡ് പുനഃസംഘടിപ്പിച്ച് സർക്കാർ. മുസ്ലിം ലീഗ് നേതാവ് എം.സി മായിൻ ഹാജിയാണ് ബോർഡിന്റെ പുതിയ ചെയർമാൻ. നിലവിലെ ബോർഡ് പിരിച്ചുവിട്ട് സമ്പൂർണ്ണ പുനഃസംഘടനയാണ് സർക്കാർ നടത്തിയത്.
കെ.എസ്.ഹംസയുടെ നേതൃത്വത്തിലുള്ള ബോർഡിലെ മുഴുവൻ അംഗങ്ങളെയും മാറ്റിയിട്ടുണ്ട്.
കുറുക്കോളി മൊയ്തീൻ, സിറാസ് ഡി കാപ്‌സി, തൊടിയൂർ മമ്മദ് കുഞ്ഞ് മൗലവി, സജ്‌ന ഫിറോസ്, ജസീം സബാഹ്, ഡോ. അബ്ദുൾ മജീദ്, സലാഹി മദീന ബീഗം, മുസ്തഫൽ ഫൈസി എന്നിവരാണ് പുതിയ അംഗങ്ങൾ. എംഎൽഎമാരുടെ പ്രതിനിധിയായിട്ടാണ് കുറുക്കോളി മൊയ്തീൻ വഖഫ് ബോർഡിൽ ഇടംപിടിച്ചത്. മുജാഹിദ് വിഭാഗത്തിനടക്കം പ്രാതിനിധ്യം ലഭിച്ചെങ്കിലും കാന്തപുരം സുന്നി വിഭാഗത്തിലെ ആരേയും ഉൾപ്പെടുത്തിയിട്ടില്ല എന്നതും ശ്രദ്ധേയം.
അമുസ്ലിം അംഗങ്ങളെ നാമനിർദേശം ചെയ്തിട്ടില്ല. സുപ്രിംകോടതിയിലും ഹൈക്കോടതിയിലും കേസ് നിലനിൽക്കുന്നത് ഉത്തരവിൽ ചൂണ്ടിക്കാട്ടിയിട്ടുണ്ട്. വഖഫ് ബോർഡ് പുനഃസംഘടനയിലെ പ്രശ്നങ്ങൾ പരിഹരിക്കണമെന്ന ഹൈക്കോടതി ഉത്തരവ് പരിഗണിച്ചാണ് നടപടിയെന്ന് ഉത്തരവിൽ പറയുന്നു.
