തിരുവനന്തപുരം : തെരഞ്ഞെടുപ്പ് കമ്മീഷണർ ഗ്യാനേഷ് കുമാർ ഏതെങ്കിലും ശക്തമായ സമ്മർദ്ദത്തിന് വഴങ്ങിയാണ് പ്രവർത്തിച്ചതെന്ന സംശയം ശക്തമാണെന്ന് കേരളത്തിലെ മുൻ മുഖ്യതെരഞ്ഞെടുപ്പ് ഓഫീസർ ടിക്കറാം മീണ. രാജ്യത്തെ തെരഞ്ഞെടുപ്പ് പ്രക്രിയ അട്ടിമറിക്കപ്പെട്ടുവെന്ന പ്രതിപക്ഷ ആരോപണങ്ങൾ വളരെ ഗൗരവമുള്ളതാണെന്ന് വ്യക്തമാക്കിയ ടിക്കാറാം മീണ, തെരഞ്ഞെടുപ്പ് കമ്മീഷന്റെ പ്രവർത്തനം പൂർണ്ണമായും സുതാര്യവും ജനാധിപത്യപരവുമായിരിക്കണമെന്നും ചൂണ്ടിക്കാട്ടി. ഒരു മാധ്യമത്തിന് നൽകിയ അഭിമുഖത്തിലാണ് അദ്ദേഹത്തിൻ്റെ പ്രതികരണം.
ഏറെക്കാലം തെരഞ്ഞെടുപ്പ് ഓഫീസറായി സേവനമനുഷ്ഠിച്ചിട്ടുള്ള ടിക്കറാം മീണ, വർഷങ്ങളായി തെരഞ്ഞെടുപ്പ് പ്രക്രിയയിൽ സുതാര്യതയില്ലെന്ന ഗുരുതര വെളിപ്പെടുത്തലാണ് നടത്തിയിരിക്കുന്നത്. കേരളത്തിലെ കഴിഞ്ഞ നിയമസഭാ, ലോക്സഭാ തെരഞ്ഞെടുപ്പുകൾ സംബന്ധിച്ച് ഉയർന്നുവന്ന ആരോപണങ്ങളെ ഇത് ശരിവെക്കുന്നതാണ്. അന്ന് വോട്ടർ പട്ടികയിൽ നിന്ന് കൂട്ടമായി പേരുകൾ ഒഴിവാക്കപ്പെടുകയും ചില പ്രത്യേക മണ്ഡലങ്ങൾ കേന്ദ്രീകരിച്ച് വ്യാപകമായ രീതിയിൽ കൂട്ടിച്ചേർക്കലുകൾ നടക്കുകയും ചെയ്തിരുന്നു. ഈ കൃത്രിമത്വങ്ങൾ തെരഞ്ഞെടുപ്പ് ഫലത്തിലും പ്രകടമായി പ്രതിഫലിച്ചിട്ടുണ്ടെന്നും അദ്ദേഹം വ്യക്തമാക്കി
മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ പ്രവർത്തനം നിയമവിരുദ്ധമാണെന്നും അദ്ദേഹം ഉടൻ രാജിവെക്കണമെന്നും ടിക്കറാം മീണ ആവശ്യപ്പെട്ടു. ഗ്യാനേഷ് കഴിഞ്ഞ ഏതാനും വർഷങ്ങളായി കൈക്കൊണ്ട എല്ലാ തീരുമാനങ്ങളും അടിയന്തരമായി റദ്ദാക്കണം. തെരഞ്ഞെടുപ്പ് കമ്മീഷനിലെ മുഴുവൻ തീരുമാനങ്ങളും ജനാധിപത്യപരമായ ഭൂരിപക്ഷ അടിസ്ഥാനത്തിലായിരിക്കണം എടുക്കേണ്ടത്. എന്നാൽ ഗ്യാനേഷിന്റെ പല പ്രവർത്തനങ്ങളും തികച്ചും രഹസ്യ സ്വഭാവമുള്ളതായിരുന്നുവെന്നും ടിക്കാറാം മീണ വെളിപ്പെടുത്തി.
