യൂറോപ്യൻ യൂണിയനിൽ (EU) പൂർണ്ണമായും തീരുവ ചുമത്തുമെന്ന് സൂചന നൽകിയതോടെ യുഎസ് പ്രസിഡന്റ് ഡൊണാൾഡ് ട്രംപ് മറ്റൊരു ആഗോള വ്യാപാര യുദ്ധത്തിന് സാദ്ധ്യത വളർത്തി. കാനഡ, മെക്സിക്കോ, ചൈന എന്നിവിടങ്ങളിൽ അദ്ദേഹം ഇതിനകം തന്നെ വലിയ തീരുവ ചുമത്തിയിട്ടുണ്ട്. കടുത്ത പ്രതിഷേധമാണ് മൂന്ന് രാജ്യങ്ങളും യുഎസിനെതിരെ ഉയർത്തുന്നത്. ട്രംപ് തീരുവ ചുമത്തിയാൽ തിരിച്ചടിക്കുമെന്ന് EU അറിയിച്ചു. ചർച്ചകളിലൂടെ ഒരു വ്യാപാര സംഘർഷം ഒഴിവാക്കാമെന്ന് പ്രതീക്ഷിക്കുന്നുവെന്നും കൂട്ടിച്ചേർത്തു.
2018-ൽ വൈറ്റ് ഹൗസിലെ തന്റെ ആദ്യ ഭരണകാലത്ത്, ട്രംപ് യൂറോപ്യൻ സ്റ്റീൽ, അലുമിനിയം കയറ്റുമതിയിൽ തീരുവ ചുമത്തിയത് ബ്ലോക്കുമായുള്ള ഒരു വ്യാപാര യുദ്ധത്തിനാണ് വഴിവെച്ചത്.
തുടർന്ന് വിസ്കി, മോട്ടോർ സൈക്കിളുകൾ എന്നിവയുൾപ്പെടെയുള്ള അമേരിക്കൻ ഉൽപ്പന്നങ്ങൾക്ക് തുല്യമായ താരിഫുകൾ ചുമത്തി EU പ്രതികാരത്തിനൊരുങ്ങി. ട്രംപ് EU-വിനെതിരെ ശബ്ദമുയർത്തുന്നത് ഇതാദ്യമല്ല. മുൻകാലങ്ങളിലും, വ്യാപാരത്തിൽ വളരെ വളരെ അന്യായമായി യൂണിയൻ യുഎസിനോട് പെരുമാറുന്നുവെന്ന് അദ്ദേഹം ആരോപിച്ചിട്ടുണ്ട്. 2024 ഡിസംബറിൽ, യൂറോപ്യൻ യൂണിയൻ കൂടുതൽ അമേരിക്കൻ എണ്ണയും വാതകവും വാങ്ങിയില്ലെങ്കിൽ അവരുമായി വ്യാപാരയുദ്ധം ആരംഭിക്കുമെന്ന് പ്രസിഡന്റ് ഭീഷണിപ്പെടുത്തി.
അതേസമയം, ഗ്രീൻലാൻഡ് ഏറ്റെടുക്കണമെന്ന യുഎസ് നേതാവിന്റെ നിർബന്ധത്തെച്ചൊല്ലി സംഘർഷങ്ങൾ രൂക്ഷമായിട്ടുണ്ട്. ധാതു സമ്പന്നമായ ദ്വീപ് വിൽക്കാനുള്ള ആശയം ഡെൻമാർക്ക് പൂർണ്ണമായും നിരസിച്ചു. പ്രകൃതിവിഭവങ്ങൾക്കും തന്ത്രപ്രധാനമായ ആർട്ടിക് സ്ഥലത്തിനും ഗ്രീൻലാൻഡിനോട് വളരെക്കാലമായി താൽപ്പര്യം പ്രകടിപ്പിച്ചിരുന്ന ട്രംപ്, വീണ്ടും തിരഞ്ഞെടുക്കപ്പെട്ടതിനുശേഷം ഈ നിർദ്ദേശം ഇരട്ടിയാക്കി. പ്രതികാര നടപടികളെക്കുറിച്ച് യൂറോപ്യൻ യൂണിയൻ മുന്നറിയിപ്പ് നൽകി. “കാനഡ, മെക്സിക്കോ, ചൈന എന്നിവിടങ്ങളിൽ തീരുവ ചുമത്താനുള്ള യുഎസ് തീരുമാനത്തിൽ യൂറോപ്യൻ യൂണിയൻ ഖേദിക്കുന്നു” – യൂറോപ്യൻ കമ്മീഷന്റെ വക്താവ് പറഞ്ഞു. “താരിഫുകൾ അനാവശ്യമായ സാമ്പത്തിക തടസ്സം സൃഷ്ടിക്കുകയും പണപ്പെരുപ്പം വർദ്ധിപ്പിക്കുകയും ചെയ്യും. അവ എല്ലാ കാര്യങ്ങൾക്കും ദോഷം ചെയ്യും.” യുഎസുമായുള്ള അനവധി വർഷത്തെ വ്യാപാര-നിക്ഷേപ ബന്ധത്തോടുള്ള EU യുടെ പ്രതിബദ്ധതയും അദ്ദേഹം ഓർമ്മിപ്പിച്ചു. ” വലിയ അപകടത്തിലേക്കാണ് ഈ തീരുമാനം കൊണ്ടെത്തിക്കുക. പകരം നിലനിൽക്കുന്ന ബന്ധം ശക്തിപ്പെടുത്തുന്നതിലേക്കാണ് രണ്ടുപേരും പരിഗണന നൽകേണ്ടത്.”
ട്രംപിൽ നിന്നുള്ള താരിഫ് ഭീഷണി തിങ്കളാഴ്ച ബ്രസ്സൽസിൽ EU നേതാക്കൾ ചർച്ച ചെയ്യുമെന്നാണ് റിപ്പോർട്ട്.
