തിരുപ്പൂർ : തിരുപ്പൂരിൽ വീട്ടിൽ വെച്ച് പടക്കനിർമ്മാണം നടക്കുന്നതിനിടെയുണ്ടായ സ്ഫോടനത്തിൽ 9 മാസം പ്രായമുള്ള കുഞ്ഞടക്കം 3 പേർ മരിച്ചു. പാണ്ഡ്യൻ നഗർ പൊന്നമ്മാൾ വീഥിയിലെ വീട്ടിലാണ് ദാരുണ സംഭവം നടന്നത്. വീട് സ്ഫോടനത്തിൽ പൂർണ്ണമായും തകർന്നു. കണ്ണൻ എന്ന കുമാർ (23), തിരിച്ചറിയാത്ത യുവതി, 9 മാസം പ്രായമായ ആലിയാസ്രിൻ എന്നിവരാണു മരിച്ചത്.
ഈറോഡ് നമ്പിയൂരിൽ പടക്കവിൽപന നടത്തുന്ന ശരവണകുമാർ, ദീപാവലിയും ഉത്സവങ്ങളുമായി ബന്ധപ്പെട്ടു കൂടുതൽ ഓർഡർ ലഭിച്ചതിനാൽ തൻ്റെ ബന്ധുവായ കാർത്തിയുടെ വീട്ടിൽ പടക്കനിർമ്മാണം നടത്തുകയായിരുന്നു. സംഭവത്തിൽ പൊലീസ് അന്വേഷണം തുടങ്ങി.
കെട്ടിടാവശിഷ്ടങ്ങൾക്കിടയിൽ കുടുങ്ങിക്കിടന്ന കണ്ണനെ (23) കണ്ടെത്തി ആശുപത്രിയിലെത്തിച്ചെങ്കിലും രക്ഷിക്കാനായില്ല. ചിതറിത്തെറിച്ച നിലയിലായിരുന്നു യുവതിയുടെ മൃതദേഹം. ഇവരെക്കുറിച്ചുള്ള വിവരങ്ങൾ ലഭ്യമായിട്ടില്ല. ഇരുവരും പടക്കനിർമ്മാണത്തൊഴിലാളികളാണ്. മരിച്ച 9 മാസം പ്രായമായ ആലിയാസ്രിൻ സ്ഫോടനം നടന്ന വീടിൻ്റെ തൊട്ടടുത്ത താമസക്കാരനായ ‘മുഹമ്മദ് ഹുസൈൻ്റെ കുഞ്ഞാണ്.
