“ഒരു പുതിയ തുടക്കം കണ്ടെത്താൻ നമ്മൾ ഒരുമിച്ച് അവരെ സഹായിക്കും. നേപ്പാൾ, നിങ്ങൾ ഒറ്റയ്ക്കല്ല” – വീടുകളും കുടുംബങ്ങളും ബാല്യവും നഷ്ടപ്പെട്ട കുഞ്ഞുങ്ങളെ ചേർത്ത് പിടിച്ച് ബോളിവുഡ് നടൻ സോനു സൂദ് ഇത് പറയുമ്പോൾ നേപ്പാളിലെ പ്രളയക്കെടുതിയിൽ ഇരയായവരുടെ മുഖത്ത് പ്രതിഫലിച്ചത് പ്രതീക്ഷയുടെ കിരണങ്ങളാണ്.
ദുരിതാശ്വാസ സഹായമായി ഇന്ത്യയിൽ നിന്നുള്ള ഭക്ഷണസാധനങ്ങളും കമ്പിളികളും ഉൾപ്പെടെയുള്ള അവശ്യവസ്തുക്കളുമായാണ് സൂദ് ചാരിറ്റി ഫൗണ്ടേഷൻ്റെ ഭാഗമായി നടൻ നേപ്പാളിലെത്തിയത്. പ്രദേശവാസികളുമായും അവിടുത്തെ കുട്ടികളുമായും സ്നേഹം കൈമാറുന്ന ചിത്രങ്ങൾ നടൻ എക്സിൽ പങ്കുവെച്ചിട്ടുണ്ട്.
പ്രളയബാധിത പ്രദേശങ്ങൾ സന്ദർശിച്ച നടൻ, ഇരയായവർക്ക് പുതിയൊരു ജീവിതം കെട്ടിപ്പടുക്കാൻ എല്ലാ പിന്തുണയും വാഗ്ദാനം ചെയ്തു. “വെള്ളപ്പൊക്കം സങ്കൽപ്പിക്കാനാവാത്ത നഷ്ടങ്ങൾ അവശേഷിപ്പിച്ച ത്രിശൂലി നദിക്കരയിലാണ് ഇന്ന് ഞാൻ നിൽക്കുന്നത്. തകർന്ന വീടുകളും തകർന്ന കുടുംബങ്ങളും ജീവിതങ്ങളും എന്നെന്നേക്കുമായി മാറി. നേപ്പാൾ ഒറ്റയ്ക്കല്ല. ഞാൻ അവിടുത്തെ ജനങ്ങളോടൊപ്പം നിൽക്കുന്നു, പ്രതീക്ഷ നൽകാനും വീടുകൾ പുന:ർനിർമ്മിക്കാനും കുടുംബങ്ങൾ വീണ്ടും ആരംഭിക്കാൻ സഹായിക്കാനും എനിക്ക് കഴിയുന്നതെല്ലാം ഞാൻ ചെയ്യും.” – സോനു സൂദ് പറഞ്ഞു.
