കോഴിക്കോട് : മേപ്പയൂരിൽ റോഡ് ഗതാഗതം തടസ്സപ്പെടുത്തി അപകടകരമായ രീതിയിൽ വിവാഹ ഘോഷയാത്ര നടത്തിയ വാഹനങ്ങൾക്കെതിരെ നടപടിയെടുത്ത് മോട്ടോർ വാഹന വകുപ്പ്. വാഹനങ്ങൾ മോട്ടോർ വാഹന വകുപ്പ് പിടിച്ചെടുത്ത് ഡ്രൈവർമാരുടെ ലൈസൻസ് സസ്പെൻഡ് ചെയ്തു. വാഹനങ്ങളുടെ രജിസ്ട്രേഷൻ താൽക്കാലികമായി റദ്ദാക്കിയിട്ടുമുണ്ട്. ഡ്രൈവർമാരെ എടപ്പാളിൽ നടക്കുന്ന റോഡ് സുരക്ഷ ക്ലാസിൽ പങ്കെടുക്കാനും മെഡിക്കൽ കോളേജിൽ ഒരു മാസത്തെ സാമൂഹ്യ സേവനത്തിനും അയയ്ക്കും.
കഴിഞ്ഞ ദിവസമാണ് മേപ്പയൂർ മഞ്ഞക്കുളത്ത് നരക്കോട് സ്വദേശികളുടെ വിവാഹത്തോടനുബന്ധിച്ച് റോഡിൽ ഗതാഗത തടസ്സമുണ്ടാക്കിയും നിയമങ്ങൾ കാറ്റിൽ പറത്തിയും വാഹനഘോഷയാത്ര നടത്തിയത്. കാറിനു മുകളിൽ കയറിയും ഡോർ തുറന്നു പിടിച്ചുമായിരുന്നു യാത്ര. മറ്റ് വാഹനങ്ങൾക്കും ഇവരുടെ യാത്ര ബുദ്ധിമുട്ടുണ്ടാക്കിയതായി നാട്ടുകാർ പരാതിപ്പെട്ടു. വാഹനങ്ങളുടെ വിവരങ്ങൾ നാട്ടുകാർ പോലീസിന് കൈമാറിയതുപ്രകാരം വിഡിയോയിലുള്ള മുഴുവൻ വാഹനങ്ങളോടും സ്റ്റേഷനിൽ ഹാജരാകാൻ നിർദ്ദേശം നൽകിയിരുന്നു.
