ന്യൂഡല്ഹി : ബ്രിക്സ് ഉച്ചകോടിക്ക് ഇന്ന് ഡല്ഹിയില് തുടക്കമാകുന്നു. ആഗോള നയതന്ത്രരംഗത്ത് നിര്ണ്ണായകമാകുന്ന തീരുമാനങ്ങള് ഉച്ചകോടിയിലുണ്ടാകുമെന്നാണ് പ്രതീക്ഷ. ചൈനീസ് പ്രസിഡന്റ് ഷീ ജിന് പിങുമായി ഇന്ന് പ്രധാനമന്ത്രി നരേന്ദ്ര മോദി കൂടിക്കാഴ്ച നടത്തും. ഏഴ് വര്ഷങ്ങള്ക്ക് ശേഷമാണ് ചൈനീസ് പ്രസിഡന്റ് ഇന്ത്യയിലെത്തുന്നത്.
റഷ്യ-യുക്രെയ്ന് യുദ്ധം, പശ്ചിമേഷ്യയിലെ സംഘര്ഷം, ഹോര്മുസ് കടലിടുക്കുമായി ബന്ധപ്പെട്ട തര്ക്കങ്ങള്, യുഎസ് ഉയര്ത്തുന്ന തീരുവ വെല്ലുവിളി എന്നിവയെല്ലാം പ്രതിസന്ധി സൃഷ്ടിക്കുന്നതിനിടെയാണ് ഉച്ചകോടി. ബിംസ്റ്റെക് കൂട്ടായ്മയുടെ അദ്ധ്യക്ഷസ്ഥാനത്തുള്ള ബംഗ്ലദേശിനെ ക്ഷണിച്ചിരുന്നെങ്കിലും പ്രധാനമന്ത്രി താരിഖ് റഹ്മാന് എത്തിയേക്കില്ല. വ്യാപാരം, ഊര്ജസുരക്ഷ, സാമ്പത്തിക വിഷയങ്ങള് അടക്കം ഉച്ചകോടിയില് ചര്ച്ചയാകും. ഉച്ചകോടയില് പങ്കെടുക്കുന്നതിനായി റഷ്യന് പ്രസിഡന്റ് വ്ളാദിമിര് പുടിന്, ഇറാന് പ്രസിഡന്റ് മസൂദ് പെസെഷ്കിയാന് ഇന്ത്യയിലെത്തി.
ബ്രിക്സ് ഉച്ചകോടിക്ക് മുന്നോടിയായി പ്രധാനമന്ത്രി നരേന്ദ്ര മോദിയും റഷ്യൻ പ്രസിഡന്റ് വ്ളാഡിമിർ പുടിനും ഉഭയകക്ഷി ചർച്ചകൾ നടത്തി. വ്യാപാരം, വ്യാവസായിക സഹകരണം, ആണവോർജ്ജം, തന്ത്രപ്രധാനമായ പങ്കാളിത്തമുള്ള മറ്റ് മേഖലകൾ എന്നിവ ചർച്ചകളിൽ പ്രധാന വിഷയങ്ങളായി. രാഷ്ട്രീയം, സമ്പദ്വ്യവസ്ഥ, പ്രതിരോധം, ഊർജ്ജം, ബഹിരാകാശം, നൈപുണ്യ വികസനം, ജനങ്ങൾ തമ്മിലുള്ള ബന്ധം എന്നീ മേഖലകളിലെ ഉഭയകക്ഷി സഹകരണത്തിന്റെ പുരോഗതി മോദിയും പുടിനും വിലയിരുത്തി. ഇന്ത്യയിൽ ആദ്യമായി നടന്ന റഷ്യയുടെ ‘ഇന്നോപ്രോം ഇന്ത്യ’ (INNOPROM India) പ്രദർശനത്തെ സ്വാഗതം ചെയ്യുകയും വ്യാപാര – വ്യാവസായിക സഹകരണം വിപുലീകരിക്കുന്നതിലെ പങ്കിനെക്കുറിച്ച് ഊന്നിപ്പറയുകയും ചെയ്തതായി വിദേശകാര്യ മന്ത്രാലയം (MEA) അറിയിച്ചു.
പ്രാദേശിക സമാധാനവും സ്ഥിരതയും നിലനിര്ത്താന് ആത്മാര്ഥ പരിശ്രമങ്ങളുണ്ടാകണമെന്ന് പശ്ചിമേഷ്യന് സംഘര്ഷങ്ങളുടെ പശ്ചാത്തലത്തില് പ്രധാനമന്ത്രി നരേന്ദ്ര മോദി, ഇറാന് പ്രസിഡന്റ് മസൂദ് പെസെഷ്കിയാനുമായുള്ള കൂടിക്കാഴ്ചയില് ആവശ്യപ്പെട്ടു. നയതന്ത്ര ചര്ച്ചകളിലൂടെയും ആശയവിനിമയങ്ങളിലൂടെയും സംഘര്ഷങ്ങള് അവസാനിപ്പിക്കണമെന്ന ഇന്ത്യയുടെ നിലപാട് ആവര്ത്തിച്ചു. ഉൗര്ജപ്രതിസന്ധി പരിഹരിക്കാന് സാദ്ധ്യമായ എല്ലാ നടപടികളും സ്വീകരിക്കണം. ഇന്ധന, വാതക കപ്പലുകള്ക്ക് സുഗമസഞ്ചാരത്തിന് വഴിയൊരുക്കണമെന്നും പ്രധാനമന്ത്രി പറഞ്ഞു. അതേസമയം, ബ്രിക്സ് രാജ്യങ്ങള് തമ്മിലുള്ള വ്യാപാരത്തില് ദേശീയ കറന്സികള് ഉപയോഗിക്കണമെന്ന് മസൂദ് പെസെഷ്കിയാന് വെള്ളിയാഴ്ച ബ്രിക്സ് ബിസിനസ് ഫോറത്തില് ആവശ്യപ്പെട്ടു. അമേരിക്കയുടെ കടന്നാക്രമണങ്ങളെയും ഉപരോധങ്ങളെയും ഇറാന് പ്രസിഡന്റ് രൂക്ഷമായി വിമര്ശിച്ചു.
ഉച്ചകോടിയുടെ ഭാഗമായി ‘ഭാരത് ഇന്നോവേറ്റ്സ്’ പ്രദര്ശനവും അരങ്ങേറും. വിദ്യാഭ്യാസ മന്ത്രാലയം വിദേശകാര്യ മന്ത്രാലയത്തിന്റെ സഹകരണത്തോടെ സംഘടിപ്പിക്കുന്ന പ്രദര്ശനത്തില് 37 ഇന്ത്യന് ഡീപ്ടെക് സ്റ്റാര്ട്ടപ്പുകളും സംരംഭങ്ങളും അണിനിരക്കും. സൈബര് ആക്രണമങ്ങള് ഉണ്ടാകാന് സാദ്ധ്യതയുള്ളതിനാല് സര്ക്കാര് ഉദ്യോഗസ്ഥരും താല്ക്കാലിക ജീവനക്കാരും ജാഗ്രത പുലര്ത്തണമെന്ന് ഡല്ഹി പോലീസ് മുന്നറിയിപ്പ് നല്കിയിട്ടുണ്ട്.
