[Photo Courtesy:ANI/X]
ഗാന്ധിനഗര്‍ : ഗുജറാത്തിലെ ഗാന്ധിനഗറില്‍ നിര്‍മ്മാണത്തിലിരിക്കുന്ന കെട്ടിടം പൊളിഞ്ഞു വീണു. ഗാന്ധിനഗര്‍ കുഡാസനിലാണ് അപകടം. പൊളിഞ്ഞ് വീണ കെട്ടിടത്തില്‍ കുടുങ്ങിയ 15 തൊഴിലാളികളെ പുറത്തെത്തിച്ചു. ഇതില്‍ 13 പേര്‍ ആശുപത്രിയില്‍ ചികിത്സയിലാണ്.
മൂന്ന് നിലകളിലായി നിർമ്മാണം നടന്നു കൊണ്ടിരിക്കുന്ന കൊമേര്‍ഷ്യല്‍ കോംപ്ലക്‌സ് ബുധനാഴ്ച രാത്രി 9.15ഓടെയാണ് പൊളിഞ്ഞ് വീണതെന്ന് ഗാന്ധിനഗര്‍ ഫയര്‍ ഫോഴ്‌സ് ചീഫ് രാജേഷ് പാട്ടേല്‍ പറഞ്ഞു. മൂന്നാം നിലയിലെ സ്ലാബ് പെട്ടെന്ന് തകരുകയായിരുന്നു. ഇതോടെ കെട്ടിടത്തിന്റെ ഒരു ഭാഗം പൂര്‍ണ്ണമായും നിലംപതിച്ചു.
ശബ്ദം കേട്ട് സ്ഥലത്തെത്തിയ പരിസരവാസികളാണ് രക്ഷാപ്രവര്‍ത്തനം ആരംഭിച്ചത്. ഫയര്‍ഫോഴ്‌സ് അംഗങ്ങള്‍ എത്തുന്നതിന് മുമ്പ് തന്നെ കെട്ടിടാവശ്ഷ്ടങ്ങള്‍ക്കിടയില്‍ കുടുങ്ങിയ നാല് പേരെ നാട്ടുകാര്‍ പുറത്തെത്തിച്ചിരുന്നു. ഫയര്‍ഫോഴ്‌സ് എത്തി രാത്രിയിലുടനീളം നടത്തിയ രക്ഷാപ്രവര്‍ത്തനത്തിലാണ് കുടുങ്ങിയപ്പോയ 15 തൊഴിലാളികളെ കൂടി രക്ഷിക്കാനായത്. രക്ഷാപ്രവര്‍ത്തനം തുടരുന്നു.
