ന്യൂഡല്‍ഹി: വോട്ടര്‍പട്ടിക ക്രമക്കേടിനെതിരെ കോക്രോച്ച് ജനതാ പാര്‍ട്ടിയുടെയും ഇടത് പാർട്ടികളുടെയും നേതൃത്വത്തില്‍ നടന്ന പ്രതിഷേധങ്ങളില്‍ ആളുകളെ കൂട്ടത്തോടെ കസ്റ്റഡിയിലെടുത്ത നടപടിയില്‍ ഐക്യരാഷ്ട്ര സഭയുടെ പ്രസ്താവനയില്‍ മറുപടിയുമായി ഇന്ത്യ. യു എന്നിന്റേത് ഇന്ത്യയുടെ ആഭ്യന്തര കാര്യങ്ങളിലുള്ള അനാവശ്യ ഇടപെടലാണ്. മനുഷ്യാവകാശ ഹൈക്കമ്മിഷണറുടെ ഓഫീസിന്റെ പ്രതികരണം അസ്ഥാനത്തുള്ളതാണെന്നും ജനീവയിലെ പെര്‍മനന്റ് മിഷന്‍ പ്രസ്താവനയില്‍ കുറ്റപ്പെടുത്തി.
‘ന്യൂഡല്‍ഹിയിലെ സംഭവങ്ങളെക്കുറിച്ച് യുഎന്‍ മനുഷ്യാവകാശ ഹൈക്കമ്മീഷണറുടെ ഓഫീസിന്റെ പരാമര്‍ശങ്ങള്‍ ശ്രദ്ധയില്‍പ്പെട്ടു. ലോകത്തിലെ ഏറ്റവും വലിയ ജനാധിപത്യ രാജ്യമാണ് ഇന്ത്യ. ഇവിടെ സമാധാനപരമായി ഒത്തുചേരാനുള്ള അവകാശം ഭരണഘടന ഉറപ്പുനല്‍കുന്നു. ശക്തമായ ഭരണഘടനാ സ്ഥാപനങ്ങളും സ്വതന്ത്രമായ നീതിന്യായ വ്യവസ്ഥയും സ്വതന്ത്ര മാധ്യമങ്ങളും അവകാശത്തെ സംരക്ഷിക്കാനായി കാവല്‍ നില്‍ക്കുന്നു. എല്ലാ ജനാധിപത്യ രാജ്യങ്ങളിലെയും പോലെ, പൊതുക്രമസമാധാനനില, നിലനിര്‍ത്തുന്നതിനായുള്ള ന്യായമായ നിയന്ത്രണങ്ങള്‍ക്ക് വിധേയമായാണ് ഇന്ത്യന്‍ പൗരന്മാര്‍ ഈ അവകാശം വിനിയോഗിക്കുന്നത്. അധികൃതര്‍ നിയമപ്രകാരമാണ് പ്രവര്‍ത്തിക്കുന്നത്. പരാതികള്‍ പരിഹരിക്കുന്നതിനായി കോടതികളെ സമീപിക്കാനുള്ള അവസരവും എല്ലാവര്‍ക്കുമുണ്ട്.’
‘അതുകൊണ്ടുതന്നെ, ഒഎച്ച്‌സിഎച്ച്ആറിന്റെ ആശങ്കകള്‍ അടിസ്ഥാനരഹിതവും ഇന്ത്യയുടെ ആഭ്യന്തര കാര്യങ്ങളിലുള്ള അനാവശ്യമായ ഇടപെടലുമാണ്. ഈ സാഹചര്യത്തില്‍, നിഷ്പക്ഷതയും വിവേചനരഹിതമായ സമീപനവും പാലിക്കുക എന്ന തങ്ങളുടെ ഉത്തരവാദിത്തത്തിനനുസൃതമായി, മറ്റ് സ്ഥലങ്ങളില്‍ നടക്കുന്ന വലിയ തോതിലുള്ള പ്രതിഷേധങ്ങളിലും സമാനമായ ശ്രദ്ധ ചെലുത്തുന്നത് OHCHR-ന് ഉചിതമായിരിക്കും.’ ജനീവയിലെ പെര്‍മനന്റ് മിഷന്റെ എക്സ് അക്കൗണ്ടില്‍ പങ്കുവെച്ച കുറിപ്പില്‍ വ്യക്തമാക്കി.
“ഡൽഹിയിൽ ഇന്ന് നടന്ന വലിയ തോതിലുള്ള പ്രകടനങ്ങൾക്ക് മുമ്പും ശേഷവും പ്രകടനക്കാർ, പ്രതിഷേധ നേതാക്കൾ, സിവിൽ സൊസൈറ്റി അംഗങ്ങൾ, അഭിഭാഷകർ, പത്രപ്രവർത്തകർ എന്നിവരെ കൂട്ടത്തോടെ കസ്റ്റഡിയിലെടുത്തതായുള്ള റിപ്പോർട്ടുകളിൽ ഞങ്ങൾ ആശങ്കാകുലരാണ്.
സമാധാനപരമായി ഒത്തുകൂടാനുള്ള അവകാശം പൂർണ്ണമായും മാനിക്കപ്പെടുകയും നിറവേറ്റപ്പെടുകയും ചെയ്യുന്നുണ്ടെന്ന് ഉറപ്പാക്കാൻ ഞങ്ങൾ അധികാരികളോട് അഭ്യർത്ഥിക്കുന്നു.”- യുഎന്‍ ഹ്യൂമന്‍ റൈറ്റ്‌സ് പ്രസ്താവനയില്‍ പറഞ്ഞതിങ്ങനെ.
ഇന്ത്യയുടെ ജനാധിപത്യ പാരമ്പര്യത്തിനും അന്താരാഷ്ട്ര മനുഷ്യാവകാശ ബാധ്യതകള്‍ക്കും അനുസൃതമായിരിക്കണം നിയമപാലകസേനകളുടെ നടപടികളെന്നും പ്രസ്താവനയില്‍ യുഎന്‍ ഹ്യൂമന്‍ റൈറ്റ്‌സ് ചൂണ്ടിക്കാട്ടി. അനിയന്ത്രിതമായും നിയമവിരുദ്ധമായും കസ്റ്റഡിയിലെടുത്ത എല്ലാവരെയും ഉടന്‍, യാതൊരു ഉപാധികളുമില്ലാതെ മോചിപ്പിക്കണമെന്നും അധികൃതരോട് ആവശ്യപ്പെട്ടിരുന്നു.
