ന്യൂഡൽഹി : 2020-ലെ ഡൽഹി കലാപ ഗൂഢാലോചനക്കേസിൽ ജാമ്യം തള്ളിയ ഡൽഹി ഹൈക്കോടതിയുടെ വിധിയെ ചോദ്യം ചെയ്ത ഹർജിയുമായി സുപ്രീം കോടതിയെ സമീപിച്ച് സാമൂഹ്യപ്രവർത്തകരായ ഉമർ ഖാലിദും ഷർജീൽ ഇമാമും. ആറ് വർഷത്തിലേറെയായി തടവിൽ കഴിയുകയാണെന്നും ഇതുവരെ പ്രോസിക്യൂഷൻ ഒരു സാക്ഷിയെപ്പോലും വിസ്തരിച്ചിട്ടില്ലെന്നും ഇരുവരും ഹർജിയിൽ വ്യക്തമാക്കി. 18 പ്രതികളും 900-ലധികം സാക്ഷികളുമുള്ള കേസിൽ വിചാരണ നടപടികൾ പോലും പൂർണ്ണമായി ആരംഭിച്ചിട്ടില്ലെന്ന് ഷർജീൽ ഇമാം പറഞ്ഞു.
പുതിയ ജാമ്യാപേക്ഷ നൽകുന്നതിനായി സുപ്രീം കോടതി അനുവദിച്ചിരുന്ന ഒരു വർഷത്തെ കാലാവധി അവസാനിക്കാറായെന്ന് ഉമർ ഖാലിദ് തന്റെ ഹർജിയിൽ വ്യക്തമാക്കി. വിചാരണയില്ലാത്ത നീണ്ട തടവുകാലം ഭരണഘടനയുടെ 21-ാം അനുച്ഛേദം ഉറപ്പുനൽകുന്ന ജീവിക്കാനുള്ള അവകാശത്തിന്റെ ലംഘനമാണെന്ന് ഇരുവരും ഹർജിയിൽ ചൂണ്ടിക്കാട്ടി.
അതേസമയം, സുപ്രീം കോടതിയുടെ ജനുവരി 5-ലെ ഉത്തരവ് മറികടക്കാൻ തങ്ങൾക്ക് അധികാരമില്ലെന്ന് ചൂണ്ടിക്കാണിച്ചാണ് ഡൽഹി ഹൈക്കോടതി മുൻപ് ഇവരുടെ ജാമ്യാപേക്ഷ തള്ളിയത്. കേസിൽ 47 സംരക്ഷിത സാക്ഷികളുണ്ട്. ഇവരുടെ വിസ്താരത്തിന് ശേഷമോ അല്ലെങ്കിൽ ഒരു വർഷത്തിന് ശേഷമോ പുതിയ ജാമ്യാപേക്ഷ സമർപ്പിക്കാമെന്നായിരുന്നു സുപ്രീം കോടതിയുടെ മുൻ ഉത്തരവ്
2020 ഓഗസ്റ്റിലാണ് ഷർജീൽ ഇമാമും സെപ്റ്റംബറിലാണ് ഉമർ ഖാലിദും അറസ്റ്റിലായത്. 53 പേരുടെ മരണത്തിനും 700-ലധികം പേർക്ക് പരിക്കേൽക്കാനും ഇടയാക്കിയ വടക്കുകിഴക്കൻ ഡൽഹി കലാപത്തിന്റെ പ്രധാന ആസൂത്രകരും ആശയ പ്രചാരകരുമാണ് ഇരുവരുമെന്നാണ് ഡൽഹി പോലീസിന്റെ വാദം. കേസിൽ ഉൾപ്പെട്ട മറ്റ് അഞ്ച് പ്രതികൾക്ക് സുപ്രീം കോടതി മുൻപ് ജാമ്യം അനുവദിച്ചിരുന്നു. എന്നാൽ ഉമർ ഖാലിദിന്റെയും ഷർജീൽ ഇമാമിന്റെയും പങ്ക് വ്യത്യസ്തമാണെന്ന് നിരീക്ഷിച്ച് കോടതി ജാമ്യം നിഷേധിക്കുകയായിരുന്നു.
ഈ കേസിൽ 2020 സെപ്റ്റംബർ 25-നാണ് ആദ്യത്തെ കുറ്റപത്രം സമർപ്പിച്ചത്. 18 പ്രതികളെ ഉൾപ്പെടുത്തിയുള്ള കേസിൽ പ്രോസിക്യൂഷൻ 900-ലധികം സാക്ഷികളെയാണ് ഉൾപ്പെടുത്തിയിരിക്കുന്നത്. ഇതിൽ 47 പേർ പേര് വെളിപ്പെടുത്താത്ത സംരക്ഷിത സാക്ഷികളാണ്. കേസിൽ ഉൾപ്പെട്ട മറ്റ് അഞ്ച് സഹപ്രതികളായ ഗുൽഫിഷ ഫാത്തിമ, മീരാൻ ഹൈദർ, ഷിഫാ ഉർ റഹ്മാൻ, മുഹമ്മദ് സലീം ഖാൻ, ഷദാബ് അഹമ്മദ് എന്നിവർക്ക് സുപ്രീം കോടതി മുൻപ് ജാമ്യം അനുവദിച്ചിരുന്നു. 2020 ഫെബ്രുവരിയിൽ പൗരത്വ ഭേദഗതി നിയമത്തിനെതിരെയുള്ള പ്രതിഷേധങ്ങൾക്കിടയിലാണ് വടക്കുകിഴക്കൻ ഡൽഹി കലാപബാധിതമായത്.
